Ta introdusí Lei di trato igual na Boneiru, Saba i Sint Eustatius
Minister di BZK a disidí pa introdusí e Lei General di trato igual na Boneiru, Saba i Sint Eustatius, e partinan karibense di Hulanda.
E desishon ta den liña ku e eksplorashon ku minister i sekretario di estado pa Relashon den Reino i Digitalisashon a risibí siman pasá di un komishon di konseho eksterno i por konta riba sosten amplio. Kolegio Ehekutivo di Boneiru, Saba i Sint Eustatius a insistí anteriormente pa introdusí i ehekutá e leinan di trato igual rápido.
Minister Bruins Slot: “Artíkulo 1 di Konstitushon ta konta pa henter Hulanda, pues pa e partinan karibense di Hulanda tambe. E legislashon básiko lo mester ta na vigor tambe na Boneiru, Saba i Sint Eustatius. E paso importante aki nos ta dal awor”.
Sekretario di estado Van Huffelen: “Tur tres Kolegio Ehekutivo a pidi mi enfátikamente aña pasá pa introdusí i ehekutá e legislashon akí mas rápido posibel. E komishon di konseho tabatin kombersashon profundo riba e islanan tokante e derecho fundamental riba trato igual. Pa ami ta hopi importante ku e entidatnan públiko tabata hopi embolbí ku realisashon di e konseho ei”.
Artíkulo 1 di Konstitushon ta kontené e prinsipio di igualdat i prohibishon di diskriminashon. A konkretisá artíkulo 1 di Konstitushon den diferente lei di trato igual, ku ta prohibí e diskriminashon basá riba e motibunan menshoná den nan. E leinan di trato igual te ku awe ta solamente na vigor den e parti oropeo di Hulanda. Pues, den esei ta bai tin kambio. Ku introdukshon di e legislashon aki, e puntonan di denunsia kontra diskriminashon i e posibilidat di Kolegio pa atendé ku kehonan di derecho humano individual, ta amplia protekshon kontra diskriminashon a base di, entre otro, koló, orientashon seksual, religion, desabilidat i sekso riba e islanan. Por hasi mihó apelashon i mantenshon di derechi riba trato igual; tambe lo hasi esfuerso pa e hendenan bira konsiente di e legislashon nobo.
Banda di tur tres Kolegio Ehekutivo, Tweede Kamer i Kolegio pa derecho humano tambe a demostrá ku nan ta na fabor. Tambe NCDR, Nationale ombudsman, Discriminatie.nl (e medionan di anti-diskriminashon ku ta trahando huntu) i e organisashonnan no-gubernamental i partnernan di kombersashon embolbí riba e tres islanan ta sostené e resultado- i rekomendashonnan. E minister ta tuma e desishon tambe na nòmber di sekretario di estado pa Relashon den Reino i Digitalisashon, minister di Enseñansa, Kultura i Siensia, minister pa Protekshon di derechi, minister pa Maneho di Pobresa, Partisipashon i Penshun, i sekretario di estado di Salubridat, Bienestar i Deporte.
E komishon di konseho ku a ehekutá e eksplorashon tabata konsistí di señor Glenn Thodé (eks gezaghèber di Boneiru) presidente di e Komishon supervishon protekshon dato personal BES (Cbp-BES), i señor Jacques van Eck (eks Staatsraad di Raad van State i miembro di Cbp-BES). Minister Bruins Slot lo inisiá e trayekto di legislashon pa deklará e leinan di trato igual aplikabel pa e parti karibense di Hulanda. Tambe lo konkretisá e medionan pa denunsia, asistensia hurídiko i tratamentu di keho.