Proyekto piloto a kuminsá pa hasi e proseso di petishon di pèrmit di trabou i di estadia mas kòrtiku
Riba promé di yüli 2023 e unidat IND i SZW di RCN i Plenchi di Trabou, den kolaborashon ku Diálogo Sentral Boneiru a start un proyekto piloto pa hasi e proseso di petishon di pèrmit di trabou i di estadia pa dunadó di trabou mas kòrtiku, si e riesgo di mal uso ta abou. Ta start e proyekto piloto riba un eskala chikitu ku 12 kompania den sektor di enseñansa, kuido i turismo.
Pa protehá e merkado laboral i prevení eksplotashon laboral, dunadó di trabou ku kier empleá un trahadó di den eksterior, tin mester di un pèrmit di trabou (‘tewerkstellingsvergunning TWV). E proseso di petishon i otorgamentu ora di un pèrmit asina, ta un trayekto intensivo i kouteloso. Por ehèmpel, un dunadó di trabou mester por proba ku no tin kandidato lokal disponibel i ku e kandidato estranhero ta kumpli ku tur kualifikashon. Tambe mester kumpli ku tur obligashon legal riba tereno di estranhero, kondishon laboral i bibienda. Ora entregá tur e komprobantenan kompleto, e unidatnan di IND i SZW ta kontrolá nan minusiosamente.
Proseso di otorgamentu muchu largu
E periodo di durashon ora di un petishon pa pèrmit ta muchu largu pa hopi dunadó di trabou, pa por keda satisfasé nesesidat di kliente. Pa e motibu aki e partidonan embolbí kier redusí e tempu di durashon pa petishon i otorgamentu di un pèrmit di trabou i di estadia. Esei ta parse posibel ora e riesgo di mal uso di parti di dunadó di trabou ta abou i si entregá e petishon kompleto. Ta bai tèst esei den un proyekto piloto di ‘high trust’ e próksimo mitar aña.
Proyekto piloto ‘high trust
Pa e proyekto piloto di ‘high trust’ a inventarisá e faktornan di riesgo i e kriterionan di selekshon. Basá riba e kriterionan akí a selektá 12 kompania ku ta forma un riesgo abou pa mal uso i ku ta dispuesto pa partisipá den e proyekto piloto. Den e proyekto piloto akí ta tèst si ta posibel pa redusí e tempu di durashon di un petishon kompletu te na dos siman. Tambe ta wak si ta entregá petishon korektamente i kompleto i si e kriterionan ta adekuá pa aplikashon mas general riba tur e islanan na Hulanda Karibense. Na òktober 2023 i yanüari 2024 lo tuma lugá un evaluashon huntu ku tur e partisipantenan. Den primavera di 2024 lo disidí kon ta bai kontinuá i kon empresanan na Saba i Sint Eustatius por partisipá mas pronto posibel.