Tim di promoshon di 'Guana Chat' den akshon na skolnan na Boneiru
Den e último simannan, e tim di promoshon di Guana Chat a bishitá tur skol primario pa informá e alumnonan tokante Guana Chat. Guana Chat ta un liña telefóniko di yudansa pa tur mucha i hóben di Boneiru entre 8 i 21 aña. Yamadanan di Guana Chat ta grátis i anónimo. Muchanan por yama Guana Chat pa papia riba tur sorto di tema.
E liña di yudansa di Guana Chat ta un kolaborashon entre e ministerionan di Salubridat, Bienestar i Deporte (VWS) i Asuntunan Interno i Relashonnan den Reino (BZK), e entidatnan públiko BES i e telefòn pa mucha na Aruba ('Telefòn pa Hubentud'). E mèntòrnan ku ta risibí e yamadanan ta boluntarionan entrená na Aruba, unda e telefòn pa hubentut ta eksistí pa 25 aña kaba. Pues nan no konosé nos hóbennan i asina ta garantisá anonimidat di e hóbennan ku ta yama. E mèntòrnan aki di Aruba ta papia 4 idioma. E kordinadornan di prevenshon di Sentro Akseso Boneiru a duna nan informashon kultural amplio tokante, entre otro, edukashon i tradishon di Boneiru. Hóbennan por aserká Guana Chat ku tur pregunta, reto i problema. Òf pa tene un kombersashon!
Sekretario di Estado Van Ooijen (VWS):
"Ta bunita ku e liña di yudansa ta disponibel na tur e islanan Hulandes Karibense. Ta hopi importante pa mucha i hóben tin un lugá ku e por aserká ku su preokupashonnan i preguntanan. Tin biaha un orea ku ta skucha ta bini ora bo yam'é".
E number grátis 918 ta disponibel tur dia for di 2’or pa 6’or di atardi. Riba e wèpsait www.guanachat918.com bo por haña mas informashon tokante e liña di yudansa i e diferente tópikonan ku mucha i hóben ke papia tokante di dje. E tim di promoshon di Sentro Akseso Boneiru i ZJCN a bishitá gruponan 5 te 8 di e skolnan primario den e último simannan pa informá e muchanan tokante e liña di yudansa i e wèpsait na unda nan por haña mas informashon. E mayornan a risibí un karta via skol ku informashon tokante e liña di yudansa aki. E number di telefòn grátis ta disponibel pa numbernan Boneriano di Digicel i Flow. Klientenan di otro ret di telefón no por hasi uso di e servisio grátis aki ainda. Nan lo djòin na un otro momentu.
Dia 8 di yüli, Guana Chat lo partisipá na e evento di Buki di Prèt di Sentro Akseso Boneiru. E evento aki pa muchanan di skol primario ta na Sentro di Bario Tera Kòrá i tin stènt tokante salubridat ku wega, show i hopi mas. Guana Chat lo ta presente ku un bòrchi di potrèt, informashon i yabero pa parti. E hóbennan huntu ku e tim di promoshon por yama ku Guana Chat pa un promé kombersashon riba un tópiko ku nan mes por skohe.
E evento lo tuma lugá for di 3’or pa 5’or di atardi riba djasabra 8 di yüli.