SZW ta invitá penshonadonan pa bini ku karchi di identifikashon
Unidat SZW (Asuntunan Sosial i Empleo) di RCN ta invitá penshonado ku ta biba na Hulanda Karibense i ta risibí AOV òf AWW pa bishitá e ofisina di SZW den luna di yüli òf ougùstùs pa kontrolá si ta na bida. Ta sufisiente pa trese un karchi di identifikashon pa e kontrol aki, no mester mustra ningun otro dokumento.
A amplia e orarionan di ofisina pa e kontrol aki. Penshonado por bishitá ofisina di SZW na Boneiru, Saba i Sint Eustatius di djaluna te ku djabièrnè for di 8or di mainta te 12or di mèrdia i di 1or di mèrdia te 3or di atardi.
Trahadónan di SZW, den kolaborashon ku instansianan pa biba i pasadia, ta ehekutá e kontrolnan aki pa e penshonadonan ku ta biba den e instansianan aki na e sitio mes. Tambe lo tin oportunidat pa penshonado na Rincon (Boneiru) registrá su mes den luna di ougùstùs. Lo anunsiá e fecha i ora eksakto despues.
Otro penshonadonan ku tin limitashon físiko òf ku no por bini ofisina durante e periodo di kontrol indiká por tuma kontakto ku SZW via number di telefòn 715 8888 (Boneiru), 318 3376 (Sint Eustatius), 416 3804 (Saba) òf manda un email na pensioen@rijksdienstcn.com pa traha un sita.