Mini konferensia Kuido pa Personanan di Edat ku Futuro Duradero na Boneiru
Dia 29 di yüni último a tuma lugá un mini konferensia tokante kuido pa personanan di edat ku futuro duradero, organisá dor di Fringe/Kennemerhart i ZJCN na Boneiru. Temanan ku a bini dilanti tabata entre otro kalidat di kuido, atenshon pa prevenshon i kolaborashon entre e partnernan den ret. Kasi tur e partidonan ku ta envolví den kuido pa personanan di edat tabata presente i a partisipá den diferente grupo di trabou. Algu ku a bin na remarke tabata e gran disposishon i kompromiso pa kolaborá.
Entre otro tabata presente representante di dòkternan di kas, e grupo ZW, Akseso, Fundashon Mariadal, Kas Flamboyan kuido di Hospice , Kalor di Hogar, FAB i kuido dor di boluntario, PCN, ZJCN i e departamento di salubridat públiko i maneho di OLB.
Puntonan di atenshon ku a surgi den e gruponan di trabou tabata: kuminsá trempan ku kolaborashon den e ret i durante di e proseso aki tambe, wak kiko e personanan di edat vital ke i por hasi ainda pa bira grandi di un forma mas felis i saludabel. Usa e medionan di komunikashon apropiá pa esei i kontrolá si e personanan di edat tambe ta satisfecho ku e sosten òf kuido ku nan ta haña. Antisipá riba e futuro i kresementu di e kantidat di personanan di edat riba e isla ku mester di kuido. E pronóstiko ta ku na 2050 mas ku 30% di e poblashon lo tin 65 aña òf mas. Den e konteksto ei tambe a papia tokante e desaroyo di plan pa un kas di kuido nobo. A pidi pa tene kuenta ku aspektonan kultural di e abitantenan riba e konteksto di biba i ta huntu. Tambe a papia tokante e konekshon di e nivelnan di edukashon di e trahadónan pa e demanda di kuido i sosten di e personanan di edat aki.
Un otro tema ku a trata tabata traha dirigí den bario. Pa un bon kolaborashon den bario ta importante ku e partnernan den ret konosé otro i sa kon pa buska otro. Durante e mini konferensia aki tabatin amplio oportunidat pa esaki. Un manehadó di programa lo bai sostené e partnernan den ret di forma aktivo den un futuro serkano pa konkretisá e kolaborashon i pa ehekutá diferente punto di akshon ku a bin dilanti den e gruponan di trabou. Den esaki, Directie Samenleving en Zorg di Entidat Públiko Boneiru i Zorg en Jeugd Caribisch Nederland (VWS) lo kolaborá pa huntu ku tur e partidonan envolví, bai den direkshon di mas ehekushon.