Marechaussee- i agentenan polisial Hulanda Karibense a haña kurso di kaptan pa boto di patruya nobo
Kolaboradónan di Koninklijke Marechaussee (KMar) i Kuerpo Polisial Hulanda Karibense (KPCN) a slag pa un kurso di kaptan na Boneiru, e asina yamá kurso di ‘Boatmaster 3’. Ku e diploma ku nan a logra, nan por kuminsá traha na Boneiru komo kaptan riba e boto di patruya nobo, ku segun plan lo kuminsá nabegá na òktober.
Durante e kurso di ocho dia, e partisipantenan, aparte di siña operá e boto, nan a siña entre otro kon pa atendé ku pagamentu di kandela i a haña teoria general. Entretantu 17 partisipante a slag pa e kurso akí.
Boto nobo
E kurso akí tabata nesesario pa por operá e boto nobo ku KMar i KPCN a kumpra huntu. Lo bai hasi uso di dje pa tareanan di polis di frontera riba laman, pa vigilá i patruyá riba awa i kontrolá barkunan. Ademas e servisionan, na tur momentu por asistí Wardakosta área Karibense den kasonan di akshon di búskeda i reskate òf den situashonnan sospechoso.
Hub Marítimo Multidisiplinario
E barku akí i e kaptannan nobo lo duna un aporte na e Hub Multidisiplinario Marítimo (MMHB). MMHB ta un aliansa entre KMar, Duana i Wardakosta ku ta enfoká riba hasi i mantené Boneiru sigur pa loke ta trata e parti marítimo.
