Sekretariado di CBP BES ta selebrá sitio nobo i ta honra sra. Esther Pourier-Thodé
Sekretariado di Komishon pa Supervishon i Protekshon di Dato Personal BES (CBP BES) ta logra un meta importante den su desaroyo. Despues di un komienso modesto na 2014, awor e sekretariado tin su propio ofisina.
Na 2014, e sekretariado a establesé den e edifisio anterior di APNA, awor konosí komo edifisio di RCN SSO, ku un kamber i un empleado dediká na protekshon di dato personal pa Boneiru, Sint Eustatius i Saba. Na 2017, e sekretariado a muda pa Kaya Alm. P. L. Brion (e edifisio anterior di IND), na unda el a kompartí espasio di ofisina ku Outoridat di Konsumidó i Merkado (ACM), ku a brinda oportunidat nobo i a fortifiká kolaborashon den organisashon di supervishon. Despues di vários esfuerso pa buska otro ofisina pa brinda servisio, finalmente CBP BES ta konta ku su propio ofisina. E sekretariado ta prepará pa brinda sosten na siudadano i organisashon ku tin pregunta tokante prosesamentu di dato personal i lo sigui intensifiká su tarea di supervishon for di un lokalidat nobo.
Durante apertura di e ofisina nobo, na honor di sra. Esther Pourier-Thodé, ku a bai nos dilanti na mei último, a inougurá e sala di reunion di e sekretariado bou di e nòmber "sala di reunion Esther Pourier-Thodé". Sra. Esther Pourier-Thodé tabata visepresidente di CBP BES for di inisio i tabata e forsa trankil den e organisashon i tabatin un responsabilidat spesial pa maneho di empresa, partikularmente asuntu di personal.
"Awe nos ta honra e kontribushon di Esther Pourier-Thodé na nos komishon dor di pone su nòmber na e sala di reunion. Esther tabata un miembro i visepresidente hopi apresiá i visepresidente ku a yuda nos komo komishon pa tene kuenta ku hende i e derechonan fundamental di individuo. E nòmber di e sala di reunion ta pa mantené su kontribushon bibu i pa mantené su perspektiva duradero durante eksistensia di nos komishon", asina presidente sr. Glenn Thodé a ekspresá.
Su kontribushon i personalidat balioso tabata di gran balor pa e komishon i e sekretariado. Ku e nòmber na e sala di reunion, nos ta mantené e rekuerdo di Esther semper ku nos.
Organisashon i siudadano por bishitá nos ku un sita. E lokalidat nobo ta na Kaya Industria 15E. Sekretariado ta alkansabel tambe via info@cbpbes.com i 7159114.