Treinen di dos dia 'Trafikashon/Kontrabanda di Hende' pa e kadena di estranhero na Hulanda Karibense
Riba 30 i 31 di mei a tuma lugá un treinen di dos dia relashoná ku 'Trafikashon/Kontrabanda di Hende' na Boneiru. E meta di e treinen tabata pa prepará funshonarionan di organisashonnan ku ta traha huntu den e kadena di imigrashon di Hulanda Karibense, pa bira eksperto riba trafikashon/kontrabanda di hende. Henk Werson, liaison di Polis Nashonal pa e region Karibense i Venezuela a duna e treinen.
Boneiru, i Saba i Sint Eustatius algu ménos, ta atraktivo pa migrantenan for di e region pa motibu di e perspektiva di trabou, e bon fasilidatnan, i e presensia di otro migrantenan ku por funshoná komo 'bruggehoofd'. Unabes riba e islanan, estranheronan ilegal ta vulnerabel. Hopi biaha ta e kaso ku nan mester a hasi debenan grandi na e retnan ku ta dediká na trafikashon di hende i nan no por paga e debenan aki bek. Esaki por tin komo konsekuensia ku nan ta kai den situashon di eksplotashon, sea den prostitushon, den konstrukshon òf den industria di hospitalidat. Eksplotashon kriminal tambe ta tuma lugá. Institutonan manera Servisio di Imigrashon i Naturalisashon Hulanda Karibense (IND CN), Inspekshon di Labor di Asuntunan Sosial i Labor (SZW CN), Kuerpo Polisial Hulanda Karibense (KPCN), Koninklijke Marechaussee (KMar) i tambe Douane Caribisch Nederland (BCN) regularmente ta haña nan ta dil, sea konsientemente òf inkonsientemente ku víktimanan di trafikashon di hende. Ta importante ku e institutonan aki ta rekonosé i tuma akshon kontra señalnan di trafikashon i kontrabanda di hende.
Temanan ku a tratá di forma interaktivo pa medio di kasonan i video tabata entre otro: kua ta e diferensia entre trafikashon di hende/kontrabanda di hende, e panorama di kriminalidat den e region i su relashon ku trafikashon di hende i kontrabanda di hende, rekonosementu di e señalnan di trafikashon di hende, e posibilidatnan hurídiko, pero prinsipalmente enfatisando e kolaborashon den e kadena di imigrashon tokante e maneho i repartishon di informashon.
Treiner Henk Werson:
“Trafikashon di hende/ kontrabanda di hende' ta un ‘haal delict’ típiko. Víktimanan no ta hasi denunsia lihé. P'esei ta importante ku e kadena di imigrashon ta rekonosé e señalnan na tempu. ‘Ta mihó prevení ku lamentá’.
Partisipantenan den e treinen tabata funshonarionan di IND CN, KMar, KPCN, SZW CN i Douane (BCN). Entre e partisipantenan pa promé biaha tambe a partisipá funshonarionan di Sentro Akseso Boneiru, un organisashon pa kuido i ayudo sosial na Boneiru. Ingrid Sealy, Unit manager di IND CN a habri e treinen.
E kadena di imigrashon ta invertí anualmente den desaroyo di ekspertisio i ta traha pa fortifiká i posishoná e kadena di imigrashon mihó pa asina atendé ku trafikashon di hende/kontrabanda di hende na Hulanda Karibense. Ademas, e kadena di imigrashon kièr hasi komunidat di Hulanda Karibense mas konsiente di e problema aki, ku tambe ta presente riba nos islanan.
Eksperensia di e treiner
Na 2021, Polis Nashonal a apuntá Henk Werson komo liaison di polis pa Reino i Venezuela. Na Polis Nashonal e la dediká su mes pa hopi aña na kombatimentu nashonal i internashonal di trafikashon di hende i awor ta traha pa kontribuí na e lucha kontra trafikashon di hende den e region Karibense.