Investigashon: tin mester di mehorashon signifikativo den dunamentu di pèrmit, supervishon i mantenshon (di lei) (VTH) pa konstrukshon, medioambiente i naturalesa na Hulanda Karibense

Notisia | 13-06-2023 | 19:05

Esei ta sali na kla for di un investigashon di Inspectie Leefomgeving en Transport (ILT) riba enkargo di sekretario di estado Vivianne Heijnen (Medioambiente). Heijnen a manda e investigashon awe pa Tweede Kamer, na nòmber tambe di sekretario di estado Alexandra van Huffelen (Relashon den Reino), minister Hugo de Jonge (Planifkashon di teritorio) i minister Christianne van der Wal (Naturalesa).

Un sistema di VTH pa konstrukshon, medioambiente i naturalesa ku ta funshoná adekuadamente ta importante. Si no tin esei, por tin konsekuensia negativo pa naturalesa, inkluyendo koral i e parkenan di naturalesa, i pa e ambiente di bida, manera aire, awa i suela.

Preokupashon

Sekretario di estado Heijnen a pidi e investigashon relashoná ku preokupashonnan tokante funshonamentu di e sistema di VTH. E preokupashonnan ei tabata biba bou di miembronan di parlamento, pero tambe serka gobernantenan lokal i habitantenan di e islanan. For di e investigashon ta resultá ku e preokupashonnan ei tabata hustifiká.

Awe sekretario di estado a presentá e investigashon na Tweede Kamer, kolegionan ehekutivo, komisario di gobièrnu sentral i konseho insular . Vivianne Heijnen: “E investigashon ta eksponé defisiensianan pisá, di kua naturalesa i medioambiente ta e víktimanan. Por ehèmpel, e refnan di koral na kosta di e islanan. Di bèrdat nos mester pone man na obra awor. E temporada benidero nos ta bai traha riba mehorashon. Mi kier hasi esaki ku koutela i huntu ku e gobièrnunan di e islanan.”

Konklushon

ILT ta konkluí ku ehekushon di e tareanan di VTH pa konstrukshon, medioambiente i naturalesa riba e tres islanan no ta kumpli ku eksigensianan legal i ordenansanan lokal. Pa e motibu ei nan no ta protehá medioambiente i naturalesa sufisientemente.

Pa logra e mehorashonnan nesesario, mester di un kambio fundamental den ehekushon di e tareanan di VTH.

E entidatnan públiko ta muchu chikitu pa organisá konosementu i eksperensia nesesario na un forma adekuá i pa por introdusí sufisiente ‘checks and balances’ den e prosesonan di trabou, ILT ta konkluí. E tamaño di e islanan komo komunidatnan chikitu i gobernashon ku ta hopi serka ta difikultá ehekushon profeshonal i independiente di e tareanan di VTH mas ainda.

Es mas, e problemátiko akí ta resultado di un situashon ku a desaroyá histórikamente, den kua diferente partido, inkluyendo Gobièrnu Sentral hulandes, a hunga un papel. Na Hulanda Oropeo tambe ta trahando na e momentunan akí riba fortifikashon di e sistema di VTH.

Aparte di esei ILT ta konkluí tambe ku e situashon serka e tres entidatnan públiko ta komparabel ku e situashon di munisipio- i provinsianan na Hulanda Oropeo te 2013. For di e momentu ei a traspasá ehekushon di e tareanan di VTH gradualmente pa servisionan ambiental.

Rekomendashonnan

ILT ta hasi kuater rekomendashon na Gobièrnu Sentral i e entidatnan públiko pa logra mehorashon di ehekushon di tareanan di VTH relashoná ku konstrukshon, medioambiente i naturalesa:

1. Pone ehekushon di e tareanan di VTH mas rápido posibel pa konstrukshon, medioambiente i naturalesa di e tres entidatnan públiko bou di un servisio ambiental eksistente na Hulanda Oropeo. Di e forma ei ta garantisá konosementu, eksperensia i kontinuidat i ta realisá ku gobernashon ta keda na un distansia;
2. Atendé i dirigí e puntonan problemátiko den e organisashon atministrativo di e entidatnan públiko rápido, den estrecho koordinashon ku e servisio ambiental. Ta asina pues ku e entidat públiko lo keda ehekutá un parti di e proseso di VTH;
3. Pèrkurá pa legislashon i regulashon aktual i adekuado pa konstrukshon, medioambiente i naturalesa;
4. Fortalesé posishon di Representante di Reino, di manera ku e por intervení ora kos bai robes ku ehekushon di e tareanan di VTH.

Kon pa sigui awor?

Awó e partidonan embolbí ta bai traha konhuntamente riba e rekomendashon- i konklushonnan di e investigashon. Djis despues di zomer sekretario di estado Heijnen lo informá Tweede Kamer tokante e siguiente pasonan, inkluyendo e rekomendashon pa hasi uso di un servisio ambiental.

No ta algu ku ta regla di un dia pa otro, pa e motibu aki ta kontinuá ku e sosten eksistente ku ta dunando na e islanan. E partidonan embolbí ta studia huntu tambe si tin medidanan ku por tuma kaba riba término kòrtiku.

Samenvatting Rapport Nulmeting uitvoering VTH-taken Bonaire (Papiamentu)

Samenvatting Rapport Nulmeting uitvoering VTH-taken Saba (Papiamentu)

Samenvatting Rapport Nulmeting uitvoering VTH-taken Sint Eustatius (Papiamentu)