Ta bai adaptá e leinan ku ta regla e relashon atministrativo i finansiero entre Hulanda Oropeo i Hulanda Karibense. E kambio ta nesesario pa mehora e relashon atministrativo i finansiero entre e entidatnan públiko i Hulanda Oropeo. Pa medio di un konsulta via internèt, habitantenan di Boneiru, Sint Eustatius i Saba por yuda pensa tokante e kambionan di leinan di WolBES i FinBES.
Invertí den konfiansa
For di 2010 e WolBES I FinBES a bini na vigor. Den WolBES tin para kon e entidatnan públiko ta organisá. Den FinBES tin para kon e relashon i e supervishon finansiero ta reglá. Delaster añanan a atkerí hopi konosementu i eksperensha tokante kon e leinan aki ta funshoná den práktika. Tin mas informashon tokante kiko ta bai bon i unda tin posibilidat pa mehorashon. Ku e kambio di lei proponé ta invertí aun mas den e base di konfiansa entre Hulanda Oropeo i Hulanda Karibense i tambe e outonomia lokal ku ta sigui progresá.
Kambionan di mas importante den WolBES i FinBES
Pa mehorá e relashonnan atministrativo i finansiero ta hasi algun proposishon. E meta ta pa oumentá e kantidat di miembronan di Konseho Insular i di Kolegio Ehekutivo. Esaki ta reforsá e demokrasia lokal. Ademas ta eliminá e funshon di Representante di Reino. Un parti di e tareanan ta bai pa e gezaghèber. Mas aleu ta e intenshon pa hasi supervishon di ehekushon di e tareanan insular mas simpel i mas fleksibel. E kambionan di lei ta kontribuí na un gobièrnu ku ta funshoná mihó i ku ta mas efikás ku ménos burokrasia, loke ta benefisiá e habitantenan di Hulanda Karibense.
Kreashon di e kambionan di lei
A krea e proposishonnan di lei den konsulta ku e entidatnan públiko Boneiru, Sint Eustatius i Saba. Banda di esei a pidi konseho na diferente ‘stakeholder’, bou di kua Rijksdienst Caribisch Nederland, Representante di Reino suplente, Kolegio di Supervishon Finansiero Boneiru, Sint Eustatius i Saba i na vários departamentu.
Habitantenan ta duna nan opinion
Tur habitante di Boneiru, Sint Eustatius i Saba por duna nan opinion tokante e proposishon di lei aki den nan mes idioma. Via un wèpsait spesial Gobièrnu Sentral ta kolekta sugerensia pa mehorashon di e proposishon di lei dor di siudadano, kompanianan i otro organisashonnan. Via diferente medio di komunikashon ta hasi un yamada aktivamente na habitantenan pa reakshoná riba e proposishon di kambio di WolBES i FinBES. Por reakshoná te 30 di sèptember 2023 (23:59 orario Hulanda Oropeo). Esaki por via https://www.internetconsultatie.nl/wolbesfinbes.
Preguntanan hopi hasí tokante konsulta via internèt
E gabinete ta haña konsulta via internèt un instrumento útil komo komplemento riba e práktika di konsulta eksistente den proseso di legislashon. Dor di konsulta via internèt mas hende, negoshi i instansia ta haña informashon tokante legislashon ku ta den preparashon i por hasi sugerensianan pa mehorá e kalidat i implementashon di e proposishonnan aki. Konsulta via internèt ta oumentá e transparensia di e proseso, e posibilidat di partisipashon públiko i ta kontribuí na e kalidat di e legislashon.
Ministerionan ta ehekutá konsultanan tokante konsepto di leinan. E Tweede Kamer ta usa e instrumento tin bia tambe pa e konsulta di proposishonnan di inisiativa.
Riba e wèpsait tin un memoria di aklarashon di e lei na Hulandes, Papiamentu i Ingles. Aki den ta splika e lei. Bo por reakshoná na Hulandes, Papiamentu i Ingles riba e proposishon di lei.
Bo por partisipá na e konsulta via internèt dor di duna un reakshon riba e preguntanan hasí. E departamento por invitá bo pa duna un reakshon riba e proposishon en general, pero tambe e por presentá un òf mas preguntanan konkreto na bo. E wèpsait espesialmente diseñá pa e eksperimento ta mustra bo e kaminda. Despues ku bo duna bo reakshon ta pidi bo, bo nòmber i e-mail. E registrashon aki ta tuma lugá di akuerdo ku e Lei di protekshon di datonan personal (Wet bescherming persoonsgegevens). Direktamente despues di finalisá e registrashon ta pidi bo, bo opinion tokante e kontenido i forma di e konsulta, a base di tres pregunta. E preguntanan aki no ta obligatorio.
Huntu ku bo nòmber i lugá di biba ta publiká bo reakshon riba e wèpsait, a ménos ku bo tin opheshon kontra di esaki. Na final di e periodo di konsulta ta studia tur reakshon i eventualmente ta adaptá e proposishon di lei. Den un relato riba e wèpsait ta menshoná den liña general e resultado di e konsulta i e prosesamentu di esei den e konsepto di proposishon. Esei ta sosodé despues ku e Konseho di Minister a aprobá e proposishon pa un lei.
Despues ku bo duna bo reakshon bo ta risibí un konfirmashon di resepshon via un aviso di e-mail. Tambe bo por indiká si bo ke pa sigui tene bo na altura di e progreso di e proseso di legislashon via di e-mail. Tokante di esaki tambe lo bo risibí un aviso di e-mail.