Proposishon di lei tokante introdukshon di Number di Servisio Sivil (BSN) i pa servisionan di parti di gobièrnu digital pa habitante di Hulanda Karibense den konsultashon
Tin sinku kambio di legislashon ku ta regla ku e Entidatnan Públiko di Boneiru, Sint Eustatius i Saba por registrá e BSN pa habitantenan i prosesá esaki, ku ta hasi legalmente posibel pa introdusí fasilidatnan di e gobièrnu digital, manera e fasilidat di drenta (‘inlog’) pa haña DigiD. Ku e DigiD habitantenan por drenta online serka instansianan di gobièrnu na Hulanda Oropeo i Hulanda Karibense i regla sierto asuntunan. Un paso importante pa dilanti den e ambishon di e gabinete pa digitalisá e servisio di gobièrnu i hasi esaki ekivalente na esun di Hulanda Oropeo. Awe e konsultá pa medio di internèt ta inisiá ku e proposishon di lei, ta presentá esaki simultáneamente pa duna konseho na e Outoridat Dato Personal i e Komishon di Protekshon di Dato Personal BES. Ta premirá ku pa 2025 e kambio di legislashon ta drenta na vigor.
Atendé asuntunan Online
E BSN ta duna habitantenan di Hulanda Karibense un number úniko na kada persona, idéntiko na e number ku gobièrnunan na Hulanda Oropeo ta usa, pa por identifiká dato di persona online. E number akí ta nesesario pa por digitalisá dunamentu di servisio di parti di gobièrnu. Manera pa introdukshon di un DigiD, ku kua un persona por demostrá online kende e ta, pa por atendé asuntu ku gobièrnu. Den e proposishon di lei ta regla tambe adelantá ku den kaso di mudamentu denter di un Entidat Públiko, no ta obligatorio mas pa presentá personalmente na ofisina. Partisipashon online di un mudamentu, ta bira legalmente posibel.
Un number úniko i fasilidat di log in den hinter e sistema di gobièrnu
Ku e BSN habitantenan di Hulanda Karibense ta keda ku solamente un number úniko pa e gobièrnu total. Riba término e BSN lo bai remplasá e number di ID i CRIB ku aktualmente ta hasi uso di dje den kontakto ku gobièrnu pa identifiká un persona. Tambe riba karchi di identifikashon nobo, ta bai pone e BSN na lugá di e number di ID. Un kondishon importante pa uso di un number di servisio sivil ta ku esaki ta úniko i sin demas informashon. Den kaso di e number di ID esaki no ta e kaso. E ta kontené un fecha di nasementu di persona i e numbernan ta limitá, ku e riesgo ku por otorgá e mesun number di ID na un otro persona. Ademas no por usa e number di CRIB den kontakto ku gobièrnu di Hulanda Oropeo. Tambe ta bai kambia e forma di log in pa MijnCN pa e DigiD, di manera ku habitantenan por usa un fasilidat pa log in na gobièrnu digital.
Tareanan nobo pa e Kolegio Ehekutivo di Entidat Públiko
Ku e proposishon di lei e Entidatnan Públiko ta bira responsabel pa traspaso di informashon na BRP i pa registrashon di e BSN den su propio atministrashon di registro sivil (PIVA). E proposishon di lei no ta kambia e prosesonan eksistente pa e promé inskripshon di residensia òf pa registro di nasementu. E Ministerio di Asuntunan Interno i Relashon den Reino i e Entidatnan Públiko aktualmente ta eksplorando mas aleu kua konsekuensianan e proposishon di lei tin pa ehekushon di e tareanan nobo di duna servisio.
Por reakshoná te 31 di yüli 2023 (23:59 orario Hulanda Oropeo). Esaki por via https://www.internetconsultatie.nl/wetbsnbes.