ACM: Tarifa máksimo elektrisidat Hulanda Karibense ta baha danki na preisnan mas abou di kombustibel
ACM (Outoridat Konsumidó i Merkado) a stipulá e tarifanan máksimo pa distribushon di elektrisidat na Hulanda Karibense. E tarifanan ta baha entrante promé di yüli 2023, pa motibu ku e preisnan pa kombustibel fòsil ku ta usa pa produkshon di elektrisidat a baha na e islanan.
Na desèmber di kada aña ACM ta stipulá e tarifanan máksimo pa produkshon i distribushon di elektrisidat na Hulanda Karibense. Pa por tene kuenta ku e preisnan variabel di preis di kombustibel ACM ta adaptá e tarifanan máksimo entrante promé di yüli si ta nesesario. E kompania distribuidornan di energia ta stipulá a base di e tarifanan máksimo akí e tarifanan ku nan ta kobra e habitantenan i empresanan.
Supsidio
E kambio di tarifa máksimo akí ta nifiká ku konsumidónan di elektrisidat lo bai paga un tarifa variabel mas abou entrante promé di yüli. E Ministerio di Asuntunan Ekonómiko i Klima a primintí ku nan lo supsidiá e tarifanan variabel ku mitar di e gastunan na 2023, si esakinan ta mas haltu ku 0,38 USD pa kWh. Komo ku e tarifanan máksimo adaptá na tur e islanan ta bira bou di e 0,38 USD e ministerio no tin mester di supsidiá e gastunan variabel akí pa mas tempu. Ademas di e supsidio pa e tarifa variabel e ministerio di Asuntunan Ekonómiko i Klima ta sòru pa e habitantenan riba e islanan no tin mester di paga pa e gastunan di mantenshon di e ret di elektrisidat (e tarifa básiko). E supsidio akí di e tarifa fiho ta konta pa henter 2023.
Boneiru
Pa Boneiru e tarifa di uso variabel máksimo ta baha di mas òf ménos 0,43 USD/kWh pa mas òf ménos 0,35 USD/kWh. E tarifa máksimo pa servisio di pagabon (e tarifa prepago) ta baha di mas òf ménos 0,68 USD/kWh pa mas òf ménos 0,59 USD/kWh, promé ku e supsidionan. Pa un kas di famia promedio esaki ta nifiká pa e konsumidó na Boneiru un bahada di mas òf ménos 14 USD pa luna (teniendo kuenta ku supsidionan).
Sint Eustatius
Pa Sint Eustatius e tarifa di uso variabel máksimo ta baha di mas òf ménos 0,50 USD/kWh pa mas òf ménos 0,37 USD/kWh. Pa un kas di famia promedio na Sint Eustatius esaki ta nifiká un bahada di konsumo di mas òf ménos 17 USD pa luna (teniendo kuenta ku supsidionan).
Saba
Pa Saba e tarifa di uso variabel máksimo ta baha di mas òf ménos 0,43 USD/kWh pa mas òf ménos 0,37 USD/kWh. Pa un kas di famia promedio na Saba esaki ta nifiká un bahada di konsumo di mas òf ménos 10 USD pa luna (teniendo kuenta ku supsidionan).