Akuerdo di bibienda ta pèrkurá pa mas kas pagabel na Boneiru
Kolegio ehekutivo na Boneiru i Hugo de Jonge, minister di Bibienda Sosial i Planifikashon di Teritorio, awe a pone nan firma bou di e akuerdo di bibienda pa Boneiru. E meta ta pa realisá 2.124 kas pagabel te ku 2030. Minister De Jonge ta pone €10 mion disponibel pa e promé porshon di e akuerdo di bibienda, kual ta hasi posibel pa konstruí e promé 500 kasnan inkluyendo infrastruktura.
Mas Kas pagabel
Na e momentu akí ta konstruyendo tur ku tin na Boneiru. Te ku 2025 ta bin 444 kas di hür sosial i kas propio pagabel aserka. Awor a duna señal pa kuminsá ku konstrukshon di 600 kas for di 2025 i den e delaster porshonnan di e akuerdo di bibienda ta bin 1.100 kas mas aserka. Esaki ta suma na 2.124 kas pagabel aserka te ku 2030.
Konstrukshon di bibienda ta hopi nesesario. E eskases na kas pagabel na Boneiru a oumentá konsiderablemente e último añanan. E poblashon a krese basta: di 15.528 abitante na 2010 pa 24.090 entrante promé di yanüari 2023. Pa e motibu akí tin mas hende ku ta buska un kas. Tambe preis di material di konstrukshon a subi i kapasidat ta skars. Partikularmente hende ku un entrada mas abou i medio tin difikultat pa haña un kas pagabel. Ku e akuerdo di bibienda akí, kolegio ehekutivo di Boneiru i minister De Jonge ta uni forsa pa trese kambio den esei.
Inisio na aserkamentu di pobresa energétiko
A firma e akuerdo di bibienda na e sitio na Hato, unda Fundashon Cas Bonairiano (FCB) ta konstruyendo 254 kas. Ta trata aki di kasnan di hür sosial i un parti ta kasnan propio pagabel. Ta konstruí e kasnan ku partinan prefabriká, di manera ku ta finalisá nan mas lihé. Un gran parti di e kasnan akí ta bira mesora ekonómiko den uso di koriente: ta pone pènel solar ku almasenamentu di bateria. Minister De Jonge durante su bishita na e sitio di konstrukshon a duna inisio mesora na e aserkamentu di Entidat Públiko Boneiru (EPB) pa kombatí pobresa energétiko. E ministerionan di Asuntunan Interno i Relashon den Reino i Asuntunan Ekonómiko i Klima ta hasi huntu €900.000 liber pa esaki.
E proyekto di konstrukshon na e sitio na Hato ta úniko den su tipo. Na masha poko otro sitio ta kombiná konstrukshon prefabriká, pènel solar i almasenamentu di bateria na e eskala akí. Den futuro ta bin un hal di konstrukshon prefabriká di manera ku e produkshon por tuma lugá ku rekurso- i hendenan lokal. WEB (Water- en Elektriciteitsbedrijf Bonaire) ta bai mónitòr e proyekto piloto aki pa haña un mihó bista di e konsumo propio di hürdó durante dia i e efekto pa e ret.
Traha riba kasnan pagabel den un bario habitabel
E akuerdo di bibienda ta forma parti di e implementashon di e agènda di maneho di Bibienda Sosial i Planifikashon di Teritorio pa Hulanda Karibense. A publiká esaki riba 22 di yanüari 2023. Meta ta pa hasi posibel pa mas hende por biba pagabel i protehá e ambiente di bida riba e islanan. Pa e motibu ei ta enfoká tambe riba mihó kompensashon pa hür, ta bin komishonnan di hür pa Saba i Sint Eustatius, i mas posibilidat di finansiamentu pa kumpradó ku nèt no ta logra keda kla ku finansiamentu di su propio kas. Un programa nobo pa desaroyo di teritorio ta bai protehá tur loke ta bunita i úniko riba tera i den laman mas mihó. Pronto lo por tira un bista den e programa aki na Boneiru, Saba i Sint Eustatius. Tur hende por entregá un reakshon e ora ei.
