Reglanan nobo di medioambiente pa Saba, Sint Eustatius i Boneiru pa protehá naturalesa vulnerabel
Entrante promé di aprel tin un sistema nobo di regla di medioambiente na vigor pa kompania-, gobièrnu- i organisashonnan embolbí na Saba, Sint Eustatius i Boneiru. E reglanan ta un paso nobo pa loke ta e esfuerso konhunto di Hulanda i e islanan pa protehá mas mihó e ambiente di bida riba e islanan i partikularmente e sistema ekológiko di koral.
E reglanan nobo ta ankrá den e lei ‘Vrom Bes’ i e dekreto di organisashon- i aktividatnan BES (IAB BES). Den IAB BES tin poné ku e kolegio ehekutivo di Boneiru, Saba i Sint Eustatius ta stipulá un maneho di supervishon i mantenshon di lei. Anualmente ta raportá na konseho insular i sekretario di estado di Infrastruktura i Maneho di Awa tokante logro di e meta- i prioridatnan ku a skohe.
Pa aktividat nobo ku por ehèmpel ta ehekutá den naturalesa vulnerabel, ta konta reglanan tokante raportahe di efektonan di medioambiente (mer). Ta bin tambe reglanan di medioambiente moderno i realisabel pa kompania riba e islanan.
Kondishonnan lokal
IAB BES ta hasi distinshon entre kompania dependiendo den ki grado e ta pone un peso riba medioambiente. Pa kompania ku tin un impakto leve te moderá riba medioambiente tin reglanan general na vigor. Esaki ta por ehèmpel kompania di garashi, kompleho turístiko i kompania di konstrukshon.
Kompania ku ta pone peso mas pisá riba medioambiente, manera lèntfel i krùsher, mester pidi un pèrmit di medioambiente a base di IAB BES. E gobièrnu insular mes ta stipulá e reglanan general den ordenansa basá riba e puntonan di salida den IAB BES. E isla mes pues ta determiná kon e ta sigui duna kontenido na e reglanan general i por tene kuenta asina ku loke ta funshoná mihó bou di e kondishonnan lokal.
Trabou na midí
Asina por ehèmpel tin poné den e reglanan general di IAB ku kompania di garashi mester garantisá ku tin mag di usa sustansia ku ta perhudiká suela solamente riba un instalashon pa protekshon di suela konektá ku otro i ku mester evitá lèkmentu di e sustansianan akí. E gobièrnu insular mes por skohe kua regla e ta mara na esaki den un ordenansa. Por ehèmpel kon den kaso di lèkmentu mester limpia rápido sustansia ku ta perhudiká suela i kiko ta e eksigensianan pa un instalashon di protekshon di suela ku ta konektá na dje (por ehèmpel flur di betòn òf baki).
Tambe tin un kantidat di regla pa protekshon di e medioambiente akuátiko vulnerabel. Asina por ehèmpel no mag basha awa shushi ku no ta purifiká den laman.
Kolaborashon
IAB ta resultado di kolaborashon entre e outoridatnan lokal, Gobièrnu Sentral i Servisionan di medioambiente. Ta kontinuá ku e kolaborashon akí e temporada benidero den forma di un programa ku kua ta bai mehorá dunamentu di pèrmit, supervishon i mantenshon di lei pa e ambiente di biba físiko.
IAB ta drenta na vigor den fase entrante promé di aprel 2024. Di e forma ei empresa- i organisashonnan embolbí ta haña sufisiente espasio pa hasi e invershonnan nesesario den material ku tin mester pa por kumpli ku e reglanan, manera separadó di zeta i filter di vèt.
Sekretario di estado Vivianne Heijnen (medioambiente):
“Ta bon ku IAB a kuminsá awor i ku huntu kuné tin reglanan kla ku mester garantisá un mihó protekshon di e medioambiente na Boneiru, Saba i Sint Eustatius. E munisipionan partikular hulandes konosé un naturalesa riku, manera e Parke Marino di Boneiru, Parke Nashonal Washington Slagbaai, Sint Eustatius National Parks i e Parkenan Nashonal di Saba. Esei ta un kapital natural grandi ku meresé ser tesorá i kuidá. E reglanan nobo akí ta bai yuda den esei.”