Kada mucha tin derecho riba kompensashon pa yu
E unidat di Asuntunan Sosial i Empleo (SZW, Sociale Zaken en Werkgelegenheid) di RCN temporalmente ta amplia su orario di ofisina i ta hiba kampaña pa hasi petishon pa kompensashon pa yu. Tur mayor i kuidadó di mucha na Hulanda Karibense tin derecho riba kompensashon pa yu. Entrante promé di yanüari 2024 e suma mensual di kompensashon pa yu na Boneiru i Saba ta 225 dòler pa mucha i 216 dòler na Sint Eustatius. SZW ta hasi yamada na mayor i kuidadó di mucha pa hasi petishon pa e kompensashon pa yu den kaso ku no a hasi esaki ainda.
Kompensashon pa yu ta un kontribushon den e gastunan di edukashon pa mucha di 0 te18 aña. Tur mayor i kuidadó di mucha ku ta siudadano di Hulanda Karibense tin derecho riba e kompensashon pa yu. No ta importá kuantu un hende ta gana. Kompensashon pa yu ta un regalo ku no mester paga bèk. E unidat Sociale Zaken en Werkgelegenheid (SZW) di RCN ta paga e kompensashon pa yu mensualmente.
Kon ta hasi petishon?
Por hasi petishon pa kompensashon pa yu na e unidat SZW di RCN. Na Boneiru esaki por riba djaluna i djárason entre 1.30 or di mèrdia i 3.30 or di atardi i riba djabièrnè di 8 or di mainta te 11.30 or di mainta. Den e siman di 22 te ku 26 di aprel tin orario di konsulta èkstra riba djaluna, djárason i djabièrnè di 8 or di mainta te 7 or di anochi na ofisina di SZW na Playa. Riba djamars i djaweps mayornan por hasi petishon pa kompensashon pa yu di 5 or di atardi te 7 or di anochi na Plasa Chiku Goeloe na Antriol.
Na Saba i Sint Eustatius por hasi petishon pa kompensashon pa yu di 8 or di mainta te 12 or di mèrdia na ofisina di SZW. Di djaluna 15 te ku djaweps 18 di aprel e ofisina di SZW ta habrí henter dia te 6 or di anochi pa hasi petishon di kompensashon pa yu. Durante e orario di ofisina spesial mayor i kuidadó di mucha ku bin hasi petishon pa kompensashon pa yu ta risibí un regalito tambe.
Pa hasi petishon di kompensashon pa yu mester bin ku e siguiente dokumentonan: sédula di e petishonario i partner den kaso ku esaki ta biba na e mesun adrès, un komprobante di e number di kuenta di banko i den kaso ku e petishonario no tin nashonalidat hulandes: un pèrmit di estadia bálido di e mayor/ kuidadó di mucha i di e yu(nan) pa ken ta hasi petishon pa kompensashon pa yu.
Tambe mayornan/kuidadónan di mucha por hasi petishon pa kompensashon pa yu ònlain dor di download e formulario di petishon riba www.rijksdienstcn.com/kinderbijslag i manda esaki huntu ku e aneksonan nesesario via e-mail pa kinderbijslag@rijksdienstcn.com.