Alida Francis huramentá komo gezaghèber di Sint Eustatius
Durante un seremonia di Konseho Insular riba 10 di aprel, a huramentá Sra. Alida Francis komo gezaghèber di Sint Eustatius. Sekretario di estado Alexandra van Huffelen di Relashonnan den Reino i Digitalisashon via di un mensahe di video a felisitá Sra. Francis ku su nombramentu ofisial. Representante di Reino interino Jan Helmond a huramentá Sra. Francis.
Sekretario di estado:
“Mi ta sumamente orguyoso ku e nativo di Statia, Alida Francis, entrante awor ta okupá e funshon di gezaghèber di Sint Eustatius. Alida Francis, promé komo komisario di gobièrnu suplente i despues komo komisario di gobièrnu, a demostrá ku e ta un mandatario ku ta dediká su mes ku hopi pashon i ku kurason i alma na e isla i na e abitantenan di Statia. E nombramentu aki ta marka e fin di un periodo den kua Sint Eustatius a traha duru riba mehorashon ku a sòru pa por hasi rekuperashon di e relashonnan atministrativo normal entre Den Haag i Sint Eustatius.”
Alida Francis (58) a nase na Sint Eustatius i na 2020, promé e tabata komisario di gobièrnu suplente i for di febrüari 2021 komisario di gobièrnu di Sint Eustatius. Promé ku esaki, el a traha komo konsehero senior di komunikashon i bosero di Rijksdienst Caribisch Nederland i tabata direktor di Turismo di e isla Sint Eustatius. Sra. Francis a studia periodismo na School of Journalism na Tilburg.
Ku e nombramentu di e gezaghèber, e di tres fase di e ‘Wet herstel voorzieningen’ di Sint Eustatius a drenta na vigor. Esaki ta pone fin na e intervenshon atministrativo na Sint Eustatius for di aña 2018. Esaki ta nifiká ku for di awor Sint Eustatius mes ta responsabel pa ehekutá su tareanan finansiero i atministrativo. Ademas, e Representante di Reino interino tin un kantidat di outoridat adishonal te ora e Lei kaduká entrante promé di sèptèmber 2024.
