Konsulta strategia di supervishon di ACM Telecom Caribisch Nederland
Outoridat Konsumidó & Merkado (ACM) huntu ku Servisio di Infrastruktura Digital di Reino (RDI) ta responsabel pa supervishon riba provedor di telekomunikashon na Hulanda Karibense. ACM ta responsabel pa supervishon riba e tarifanan di e provedornan di servisio di telekomunikashon na Hulanda Karibense. Ademas, ACM ta responsabel pa e repartishon di number di telefòn. Tambe, ACM por tuma desishon den kaso di desakuerdo entre e provedornan di telekomunikashon.
Dikon ACM tin un strategia nobo di supervishon?
Ministerio di Asuntunan Ekonómiko i Klima (EZK) a modernisá i harmonisá e leinan i regulashon ku ACM mester supervisá. Asina a kambia e 'Besluit Opgedragen Diensten' na 2020 pa asina awor tambe tin regla pa ofresé servisio di internèt. Ademas, EZK a tuma e 'Besluit Algemene Richtlijnen Houders van een concessie Wet telecommunicatievoorzieningen BES' (BARC) dia 7 di ougùstùs 2023. Basá riba e último desishon aki, ku lo drenta na vigor dia 1 di sèptèmber 2024, ACM ta supervisá entre otro e desaroyo di e tarifanan di telekomunikashon na Hulanda Karibense den un kuadro di evaluashon nobo. Esaki ta rekerí un strategia nobo di supervishon di ACM.
Kiko tin den e strategia di supervishon?
Den e strategia di supervishon di ACM pa telekomunikashon na Hulanda Karibense ta spesifiká kon ACM tin plan pa realisá su supervishon riba e BARC den e añanan binidero i kua meta e ta persiguí. Asina ta deskribí kua dokumento e provedornan di telekomunikashon mester entregá i kua rekisito e mester tene kuenta kuné. Ademas, e strategia di supervishon aki ta enfatisá algun desaroyo ku (posiblemente) por tin impakto riba servisio di telekomunikashon i riba e supervishon.
Dikon ACM ta konsultá su strategia di supervishon?
ACM ta konsultá e strategia di supervishon aki pa identifiká problema na tempu. E konsulta aki ta habri pa tur abitante i empresa na Hulanda Karibense. Bo por duna bo reakshon riba e strategia di supervishon te ku 10 di mei 2024.
Por entregá reakshon tantu via pòst komo meil ku menshon di "Konsulta strategia di supervishon di ACM pa Telecom Caribisch Nederland". E adrès postal ta ACM, Direktoraat TVP, Pòstbus 16326, 2500 BH Den Haag. Adrès di e-mail ta TelecomPostCN@acm.nl
Na momentu di entrega bo punto di bista, ACM ta bai pidi bo pa indiká si bo punto di bista ta kontené dato konfidensial, i si esei ta e kaso, pa indiká motivá kua nan ta. Si na bo konsepto bo reakshon ta kontené informashon konfidensial, bo mester entregá un vershon konfidensial i un públiko di bo punto di bista.