18 mion pa ehekushon di tareanan di Boneiru, Saba i Sint Eustatius
For di 2024, e gabinete hulandes ta saka 8.6 mion euro pa aña pa hasi Boneiru, Saba i Sint Eustatius mas kapas pa ehekutá su tareanan komo entidat públiko. Esaki ta pará den e ‘Voorjaarsnota 2024’ ku a bai pa Eerste i Tweede Kamer. Ku esaki e gabinete ta sigui konseho di tantu e investigashon 'Eilandelijke taken en middelen Caribisch Nederland' di IdeeVersa komo e rapòrt di e Konseho di Atministrashon Públiko (Raad voor Openbaar Bestuur, ROB) pa oumentá e kompensashon liber. E kompensashon liber ta e suma fiho ku e islanan ta risibí tur aña pa entre otro maneho di e espasio públiko, supervishon i mantenshon i bienestar.
Ademas di e oumento di e kompensashon liber, entrante 2024, e gabinete ta pone 5 mion euro disponibel anualmente. Ku e sèn adishonal aki, e tres entidatnan públiko, den nan ròl komo dunadó di trabou, por kompensá e efekto di e oumento di salario mínimo legal (Wettelijk Minimumloon, WML). Tambe, esaki ta permití e entidatnan públiko pa adaptá e kondishonnan laboral di nan empleadonan na esun di Rijksdienst Caribisch Nederland (RCN). Asina nan posishon komo dunadó di trabou ta mehorá i ta krea mas espasio finansiero pa ehekushon di e tareanan grandi tantu riba tereno sosial komo físiko.
Tene kuenta ku kresementu
Entrante 2024, manera ehèmpel di e fondo munisipal, e sistema di BBP tambe lo drenta na vigor pa Boneiru, Saba i Sint Eustatius. Ku esaki, entrante 2024, 4.5 mion euro adishonal lo bira disponibel pa e tres islanan. Pa e siguiente añanan di presupuesto, e suma aki lo subi un poko mas. E produkto interno bruto (BBP) ta un indikadó di kresementu ekonómiko. E diferensia ku e sistema aktual ta ku for di awor e entidatnan públiko, meskos ku e munisipionan hulandes, lo risibí un kompensashon ora suèldu i preisnan subi, pero tambe lo tin mas libertat pa hasi nan propio eskoho pa traha maneho. Ademas, for di awor ta mas fásil pa nan por traha un presupuesto di mas aña.
Sekretario di Estado Van Huffelen:
“Mi ta sumamente kontentu ku e paso finansiero importante ku e gabinete demishonario ta tuma pa Boneiru, Saba i Sint Eustatius. Ku e 18 mion euro aki, ku ta disponibel tur aña, e islanan ta risibí sèn struktural pa tareanan struktural. Asina nan por traha i ehekutá plannan di futuro di largu plaso. Esaki ta loke mi a palabrá ku e tres entidatnan públiko durante e konferensia atministrativo di WolBES i FinBES. Pa nan por ehekutá nan tareanan bon i mas independiente posibel. Ta hopi importante ku strukturalmente nan tin sufisiente hende pa hasi esaki i ku ménos posibel karga di burokrasia i preshon di regla. Den e próksimo tempu lo mi sigui den kombersashon ku e entidatnan públiko i e departamentonan na Den Haag pa fortifika ainda mas e relashon finansiero ku e islanan i pa oumentá e forsa di ehekushon na e islanan.”
Mas tarea, mas forsa di ehekushon
E pakete di tarea di e entidatnan públiko ta kasi igual ku tareanan di e munisipionan hulandes oropeo. Pero e entidatnan públiko tambe ta responsabel pa, por ehèmpel, e maneho di awa i instalashon di purifikashon di awa. Esaki ta tareanan ku na Hulanda ta e ‘waterschap’ i e provinsia ta ehekutá. Mirando e importansia di e infrastruktura pa e siguridat di bida, maneho di naturalesa i medio ambiente, mitigashon i adaptashon di klima i konektividat di e islanan, e entidatnan públiko huntu ku BZK lo hasi un análisis di e invershonnan nesesario pa mantené i remplasá e infrastruktura vital na e islanan. Ku e sèn adishonal ku awor ta reservá den e ‘Voorjaarsnota 2024’, ta krea mas espasio finansiero pa reklutá personal adishonal. Fortifikashon di forsa di ehekushon ta hopi nesesario, pa motibu ku e islanan ta enfrentá tareanan grandi, entre otro manera ta stipulá den e akuerdonan atministrativo.