Eksitoso marshe di informashon detenshon i re-integrashon ku partisipashon amplio di partnernan di kadena
E marshe di informashon tokante detenshon i re-integrashon ku a tuma lugá dia 18 di aprel 2024, tabata un gran éksito ku un kantidat impreshonante di partisipante i interesado. E evento, organisá pa Instituto Hudisial Hulanda Karibense (JICN), a trese un variedat di profeshonal enbolbí den detenshon i re-integrashon huntu, ku e meta pa interkambiá konosementu, traha riba ret i promové un regreso eksitoso den komunidat di persona ku ta sali for di detenshon.
E marshe di informashon a ofresé un oportunidat úniko pa partnernan di kadena siña di otro su ekspertisio, kompartí eksperensia i traha huntu pa mehorá e proseso di detenshon i re-integrashon. Ku seshon informativo i oportunidat di nètwèrk, partisipantenan a haña un bista mas profundo di e reto- i oportunidatnan den e área aki.
Un di e puntonan di e marshe di informashon ku mas a hala atenshon tabata e gran diversidat di partner di kadena ku tabata presente, entre otro representante di organisashon di ‘reclassering’, institushon edukativo, dunadó di trabou, organisashon sosial i instansia di gobièrnu. Nan embolbimentu i partisipashon aktivo a kontribuí na un interkambio fruktífero di idea i mihó práktika.
Durante di e marshe di informashon a diskutí tokante vários tema importante, for di prosedura di detenshon i programa di re-integrashon, te kuido i sosten despues di detenshon.
Charlotte Fairbairn, direktor suplente di JICN: “Nos ta kontentu ku e enorme kantidat di partisipante i embolbimentu di partner di kadena na e marshe di informashon aki. E ta mustra ku tin un deseo komun fuerte pa traha huntu pa mehora e proseso di detenshon i re-intergashon, ku e meta final di promové un regreso eksitoso di persona ku ta regresá bèk den komunidat despues di sali for di detenshon.
Tambe JICN ta enfatisá riba e importansia di sosiedat pa brinda oportunidat na eks detenido. Re-integrashon eksitoso di e individuonan aki no solamente ta eksigí empeño for di e sistema di detenshon i re-integrashon, pero tambe komprondementu, sosten i posibilidat for di e sosiedat den su totalidat.
E marshe di informashon riba detenshon i re-integrashon tabata un evento balioso i ku a inspirá i kontribuí na e oumento di konosementu i kolaborashon den e área importante aki. JICN ta wak bèk riba un dia eksitoso i ta gradisí tur partisipante i partner di kadena pa su kontribushon na e éksito di e marshe di informashon.