Mas oumento di suèldu mínimo i benefisio sosial na Hulanda Karibense entrante promé di yüli 2024
Entrante promé di yüli 2024 Ministerio di Asuntunan Sosial i Empleo (SZW) ta oumentá e suèldu mínimo legal na Boneiru, Sint Eustatius i Saba ku respektivamente 11,4 porshento, 12,6 porshento i 5,8 porshento. E suèldu mínimo ta suma e ora ei riba tur tres isla, konforme konseho di e Komishon Mínimo Sosial, 1.750 dòler pa luna pa un siman di trabou di 40 ora. Tambe e sumanan di benefisio sosial manera e penshun di AOV i Ònderstant ta subi.
E suèldu mínimo legal di un trahadó di 21 aña òf mas ta suma entrante promé di yüli 2024, 10 dòler i 10 sèn pa ora. E suèldu mínimo ta igual riba tur tres isla. Pa hóben e suèldu mínimo ta dependé di e edat i ta suma respektivamente $9,09 (20 aña), $8,58 (19 aña), $7,57 (18 aña) i $6,56 (16/17 aña).
E penshun di behes legal (AOV) ta suma entrante promé di yüli 2024, si e ta kompletamente konstruí, 1.488 dòler pa luna. E montante di AWW ta dependé di edat. Ta oumentá e pago pa viuda di 58 aña i mas tambe na 1.488 dòler. Entrante promé di yüli ta oumentá e Ònderstant tambe pa un persona ku ta biba independiente na mas òf ménos 1.488 dòler pa luna; pago di Ònderstant ta tuma lugá kada kinsena. Si un persona ku ta biba independiente ta kompletamente inkapasitá tambe, e ora ei e pago di Ònderstant ta suma alrededor di 1.750 dòler pa luna.
E kompensashon pa yu no ta kambia e ta keda 225 dòler pa kada yu pa luna na Boneiru i Saba i 216 dòler na Sint Eustatius.
Por haña e resúmen ku tur e montantenan eksakto di e suèldu mínimo legal i benefisionan sosial den 2024 riba www.rijksdienstcn.com.
Redukshon di primanan di dunadó di trabou
Gabinete ta kompensá dunadó di trabou parsialmente den e gastunan di subida di e suèldu mínimo pa medio di redukshon di e prima ku dunadó di trabou mester paga riba e gastunan salarial bruto ku un total di 3,1 punto prosentual. Entrante promé di yanüari 2024 a redusí e primanan ku dunadó di trabou ta paga pa medio di Belastingdienst CN, di 13,4% na 11,9%. Entrante promé di yanüari 2025 ta sigui redusí e primanan di dunadó di trabou na 10,3%. Kiko e redukshon di prima akí ta nifiká eksaktamente pa un kompania, ta varia pa kada dunadó di trabou i ta dependé di e kantidat di trahadó i haltura di su salario.
Ministerio di SZW i BZK ta vigilá ekonomia i merkado laboral riba posibel efekto di e subida di e suèldu mínimo i benefisionan sosial.