Habitantenan di Hulanda Karibense mihó protehá kontra diskriminashon
Konseho di minister riba proposishon di minister De Jonge (Asuntunan Interno i Relashonnan den Reino) a bai di akuerdo pa manda e legislashon di trato igual den e parti Karibense di Hulanda pa Tweede Kamer. Esaki ta nifiká ku habitante di Boneiru, Sint Eustatius i Saba por hasi un apelashon riba e leinan aki si e sinti su mes diskriminá. E legislashon na e momentunan akí ta konta solamente pa e parti Oropeo di Hulanda.
Minister De Jonge: ‘’A bira tempu pa dal e paso importante akí; trato igual ta un derecho fundamental. Artíkulo 1 ta konta pa Hulanda kompletu, pues pa e parti Karibense tambe. Asina nos ta garantisá ku tur hende na Boneiru, St. Eustatius i Saba ta protehá tambe kontra diskriminashon.’’
Sekretario di estado Van Huffelen: “Aña pasá e kolegionan ehekutivo a pidi mi enfátikamente pa introdusí i implementá e legislashon akí mas pronto posibel. Komishon Thodé, ku a eksplorá kiko tin mester pa introdusí e legislashon akí na Boneiru, St. Eustatius i Saba, tabatin kombersashonnan profundo riba e islanan tokante derecho fundamental riba trato igual. Pa ami ta di sumo importansia ku e entidatnan públiko tabata embolbí di forma estrecho den realisashon di e eksplorashon akí”
Pa medio di e proposishon akí habitantenan di Hulanda Karibense, ku pa kualkier motibu (sekso, orígen, religion, desabilidat, orientashon seksual ets.) ta sinti nan mes diskriminá, por hasi un apelashon riba e stipulashonnan kontra deskriminashon. Tambe nan por hasi denunsia serka e sentro kontra diskriminashon BES nobo i pidi ayudo i konseho grátis einan. Pa esaki kada isla ta haña un lokèt unda ta atendé tambe ku preguntanan hurídiko mas amplio. Finalmente nan por akudí na Kolegio di derechonan humano pa un opinion den nan kaso.
Proseso di kontinuashon
Siudadano-, empresa- i organisashonnan sosial ya por a duna nan opinion kaba riba e proposishon a traves di konsulta via internèt. A prosesá e input ei i e proposishon a bai Raad van State pa konseho, ku a duna konseho positivo. Awor gabinete ta manda e proposishon di lei pa Tweede Kamer. Segun planifikashon e proposishon di lei ta drenta na vigor na 2025.