Sint Eustatius ta dal un paso importante riba e kaminda pa Integrated Care and Living Centre
Sint Eustatius – Dia 28 di novèmber e grupo di guia di kuido na Sint Eustatius huntu ku AMPC International Health Consultants a firma un kontrakt pa e promé fase di desaroyo di e Integrated Care and Living Centre nobo. Firmamentu di e kontrakt aki ta marka un logro importante den mehorashon di e infrastruktura di kuido na e isla.
E Grupo di guia ku ta realisá e sentro di kuido multifunshonal aki ta konsistí di e kuater partnernan di kuido na e isla: St. Eustatius Auxiliary Home Foundation, St. Eustatius Health Care Foundation (SEHCF), Ministerio di Salubridat, Bienestar i Deporte (VWS), i Departamentu di Salubridat Públiko (GGD) di Entidat Públiko Sint Eustatius (OLE).
Kolaborashon i ambishon mutuo
E Grupo di guia ta orguyoso di a logra e echo importante aki.
“E sentro nobo ta uni prevenshon di kalidat haltu i kuido médiko i geriátriko na ún lokalidat, pasobra esaki ta kumpli ku e nesesidatnan spesífiko di e komunidat na Sint Eustatius.”
Embolbimentu di e poblashon
Un aspekto importante di e promé fase aki ta embolbimentu di poblashon i suministradónan di kuido. AMPC ta inventarisá deseonan i nesesidatnan di tur esnan enbolbí kuidadosamente i ta evaluá si nan ta alkansabel, di manera ku e sentro nobo ta konektá ku e espektativanan i posibilidatnan di e isla optimalmente.
Reakshonnan di e Grupo di guia di Kuido
Grupo di guia di Kuido ta enfatisá importansia di kolaborashon i embolbimentu lokal:
“E paso aki ta simbolisá e ambishon kolektivo di St. Eustatius Auxiliary Home Foundation, SEHCF, VWS i OLE pa hisa e nivel di kuido na Sint Eustatius. E Integrated Care and Living Centre nobo lo tin un papel esensial den mehorashon di kuido, prevenshon di enfermedat, i bienestar di nos komunidat.”
Tokante AMPC International Health Consultants
AMPC ta un ofisina di konseho renombrá ku ta un spesialista den diseñá, konstruí i muebla instituto di kuido. Ku eksperensia ekstenso den diferente region, inkluso e region karibense (entre otro na Jamaica i Aruba), AMPC ta ofresé ekspertisio ku ta kuadra ku e retonan spesífiko di Sint Eustatius.
Siguiente pasonan
Den e lunanan benidero, e partidonan enbolbí lo traha huntu estrechamente riba un diseño detayá. Ta spera di entregá e Integrated Care and Living Centre nobo denter di 3 pa 5 aña, i e lo nifiká un mehorashon duradero pa e infrastruktura di kuido na e isla.
