Kambio den e pakete di derecho di seguro di kuido Hulanda Karibense entrante promé di yanüari 2025
Kralendijk – Kuido i Hubentut Hulanda Karibense (Zorg en Jeugd Caribisch Nederland - ZJCN), ta informá ku entrante promé di yanüari 2025 tin kambio den e pakete di derecho di seguro di kuido pa habitantenan di Boneiru, Sint Eustatius i Saba. E Areglo di derecho riba seguro di kuido BES (Regeling aanspraken zorgverzekering BES - RazBES) ta stipulá kua kuido ta kompensá pa aseguradonan di ZJCN i e ta spesífikamente diseñá pa hasi kuido di salú na Hulanda Karibense mas aksesibel i mihó adaptá na e nesesidatnan di e poblashon di Boneiru, Sint Eustatius i Saba.
Resúmen di e kambionan den e pakete di derecho
Ta kompensá terapia di ehersisio pa COPD, sin un kantidat máksimo di tratamentu
Entrante 2025 ta kompensá terapia di ehersisio pa pashènt ku COPD sin un kantidat máksimo di seshon. E kompensashon ta kuminsá mésora for di e promé tratamentu. Pa terapia di ehersio i fisioterapia tin mester di pèrmit delantá di ZJCN.
Kompensashon pa terapia di ehersisio pa artritis reumatoida pisá
Personanan serka kende a konstatá limitashonnan funshonal signikativo debí na artritis reumatoida, ta haña e terapia di ehersisio kompletamente kompensá entrante promé di yanüari 2025. Pa esaki tambe ta konta ku tin mester di pèrmit delantá di ZJCN.
Ta kompensá kuido di revalidashon geriátriko
Entrante promé di yanüari 2025 ta menshoná kuido di revalidashon geriátriko spesífikamente komo un derecho. Un spesialista di medisina geriátriko ta evaluá si revalidashon geriátriko ta e kuido mas adekuado.
Derecho riba un di dos akompañante den kaso di traslado médiko
Aseguradonan di 18 aña pa riba ku ta den un situashon terminal grave òf agudo ku ta pone bida na peliger, por hasi uzo, despues di pèrmit di ZJCN, di e derecho riba un di dos akompañante den kaso di traslado médiko. Esaki ta pa duna sosten èkstra, mirando e vulnerabilidat i peso físiko i emoshonal ku situashonnan asina ta trese kuné.
Prueba di aptitut pa akompañante den kaso di traslado médiko
Entrante 2025 ta introdusí un prueba di aptitut pa garantisá ku akompañante ta bon prepará pa su ròl. Esaki ta nifiká ku e mester ta apto pa yuda ku aktividatnan di bida diario, pero tambe por duna sosten mental na momentu di desishonnan importante.
Eliminashon di e kriterio di ‘mihó orea’
Te ku 2024 tin un kriterio di ‘mihó orea’ na vigor den kaso di kompensashon pa pèrdida di oido. Esaki ta nifiká ku no ta posibel pa kleim si e oido di e mihó orea ta surpasá e limité di kompensashon. Entrante promé di yanüari 2025 e kondishon akí ta kaduká, loke ta nifiká ku e kompensashon no ta dependé mas di oido di e mihó orea.
Informashon importante pa dunadó di trabou
Pa kompensá dunadónan di trabou na Hulanda Karibense pa e gastunan di suèldu ku a subi debí na oumentu di e suèldu mínimo den 2024, ta redusí e porsentahe di prima di 11,7% na 9,3% entrante promé di yanüari 2025. Esaki ta brinda alivio finansiero i ta forma parti di e ahustenan den e Areglo pa stipulashon di e porsentahe di prima pa empleado i dunadó di trabou BES (‘Regeling vaststelling premiepercentages werknemer en werkgever BES’).
Si tin pregunta, tuma kontakto ku ZJCN via info@zorgverzekeringskantoor.nl òf bishitá e página di ZJCN riba www.rijksdienstcn.com.