A firma akuerdo di programa di apoyo pa gobernantenan di BES
Sekretario di estado Zsolt Szabó di Relashon den Reino i Digitalisashon, a firma djamars último un memorandum di akuerdo pa e programa di apoyo i profeshonalisashon pa promové bon gobernashon na Boneiru, Sint Eustatius i Saba. E la hasi esei huntu ku gezaghèbernan di Boneiru, Sint Eustatius i Saba, i e asosiashonnan profeshonal di alkalde, wethouder, miembro di konseho munisipal, sekretario munisipio i griffier.
Ku e programa di apoyo ta pone e oferta pa profeshonalisá e asosiashonnan profeshonal na disposishon di Boneiru, Sint Eustatius i Saba. Ta trata di entre otro tayer-, kurso-, entrenamentu pa miembro di konseho insular, diputado, gezaghèber, griffier i kolaboradó di griffier. Ta tene kuenta ku e konteksto karibense i nesesidat di e islanan.
Pa kada un di e 3 islanan a traha un memorandum ku e sekretario di estado i gezaghèbernan John Soliano di Boneiru, Alida Francis di Sint Eustatius i Jonathan Johnson di Saba a firma riba djamars.
Na nòmber di e asosiashonnan profeshonal, Jeroen van Gool di e Asosiashon di wethouder, Abdullah Uysal di Asosiashon di Miembro di Konseho, Esther Sommer di Asosiashon di Sekretario di Munisipio, Arnout van Kooij di Asosiashon di Griffier i Hilde Westera di Asosiashon hulandes di Alkade a pone nan firma bou di e akuerdo.
Prioridatnan
‘Mi ta hopi kontentu ku e asosiashonnan profeshonal i e islanan a disidí di uni forsa pa realisá esaki’, Sekretario di estado Szabó a bisa. E programa di apoyo ta pas bon den un di e prioridatnan di e sekretario di estado, esta promoshon di bon gobernashon.
‘Pa promové bon gobernashon ta importante pa invertí den profeshonalisashon di posishon i efektividat di gobernantenan polítiko, sekretarionan insular i griffiernan insular’, segun Szabó. E otro dos prioridatnan di e sekretario di estado ta finansa gubernamental sólido i oumentu di e poder di e islanan pa para riba nan propio pia.
Mas Refuerso
‘Refuerso di kapasidat ta hopi importante pa un isla chikitu manera Saba i nos por benefisiá di e apoyo ofresé. Na mes momentu e asosiashonnan profeshonal tambe por siña di Saba’, gezaghèber Johnson a bisa. ‘Desaroyo di e islanan ta un proseso ku nos mester duna kontenido konhuntamente. E programa akí ta un instrumento importante pa yuda otro’, gezaghèber Soliano a bisa. ‘Pa bienestar di mas desaroyo di e islanan, nos ta traha konhuntamente pa sigui fortalesé gobernashon lokal’, gezaghèber Francis a bisa. ‘Pa nos esaki ta enserá ku ta hasi e esfuerso i apoyo di e último añanan mas duradero, di manera ku nos por apoyá Boneiru, Sint Eustatius i Saba durante mas aña’, Van Gool di e Asosiashon di Wethoudernan a bisa.
Poder di demokrasia
‘Un konseho fuerte ta importante. Ku e programa akí nos ta invertí den fortalesa di demokrasia lokal’, segun Uysal di e asosiashon di miembronan di konseho. ‘Esaki ta un siguiente paso den nos kontaktonan i pa sigui profeshonalisá e gezaghèbernan mas’, Westera di e asosiashon di alkaldenan a bisa. ‘Ta bunita pa traha huntu pa logra un gobièrnu mas fuerte’, segun Sommers di e asosiashon di sekretarionan di munisipio.
Ministerio di Asuntunan Interno i Relashon den Reino (BZK) ta hasi e programa posibel pa medio di un supsidio na e asosiashonnan profeshonal. Boneiru, Sint Eustatius i Saba i e asosiashonnan profeshonal a partisipá intensamente den realisashon di e programa.