Prosedé ku integridat na Boneiru, Sint Eustatius i Saba
E rapòrt ‘Ambtelijk-bestuurlijke integriteit’ na Hulanda Karibense di ‘Wetenschappelijk Onderzoek- en Datacentrum’ (WODC) ta duna un bista aktual di vulnerabilidat den integridat di gobernante i ámtenarnan na Boneiru, Sint Eustatius i Saba. For di e rapòrt a sali na kla ku probablemente ta hasi hopi uso di poder di un manera inkorekto. Esaki por lo general no ta kondusí na echonan kastigabel manera froude i korupshon.
Tòg e kabinèt i gobernantenan ta haña e resultadonan di e rapòrt preokupante i nan ta mira e nesesidat pa un enfoke konhuntamente ku medidanan severo. Den e enfoke e gobernantenan ta responsabel pa nan propio maneho di integridat, e sekretario di estado di Digitalisashon i Relashonnan den Reino ta responsabel pa e prekondishonnan ehekutivo i hurídiko i e minister di Hustisia i Seguridat pa tur kos ku ta konserní derecho penal.
Zsolt Szabó: “Integridat di mandatarionan polítiko i ámtenar ta un parti esensial di bon gobernashon i un prekondishon pa kresementu ekonómiko i outosufisiensia di e islanan.”
David van Weel: “Habitante i empresarionan na Boneiru, Sint Eustatius i Saba mester por konfia ku e gobièrnu ta transparente i hustu i ta komprometé su mes ku e interes general.
Den e reakshon di maneho riba e rapòrt ku a manda awe pa Tweede kamer, Zsolt Szábo sekretario di estado di Digitalisashon i Relashonnan den Reino, i David van Weel, minister di Hustisia i Seguridat ta anunsiá medidanan i un enfoke konhunto ku gobernantenan di e isla. E enfoke aki ta basá riba rekomendashon for di e rapòrt: Fortalesé e kuadro i prosedura hurídiko, komportashon ehemplar den tòp, fortalesé supervishon inter-gubernamental i sòru pa prekondishonnan sosial i monitoreá integridat.