Representante di Reino iterino ta tuma medida konkreto na Selibon Lagun
Den e simannan ku ta tras di lomba, Representante di Reino interino(wRv) a tuma medidanan pa atendé ku e riesgonan di mas urgente na Selibon Lagun. Promé ku Pasku ainda lo proveé e sentro di sushi ku un waya adekuá. Lo drecha kònteiner di sushi ku ta kontené asbèst. Tambe lo traha duru riba eliminashon di sushi biomédiko. Entrante promé di yanüari lo prosesá residuo di bestia di abatuar segun e reglanan korekto.
Kolaborashon
For di 15 di novèmber, e wRv a tuma lugá di Kolegio Ehekutivo di Entidat Públiko Boneiru (OLB) pa sierto tarea relashoná ku Selibon Lagun. Lo tuma e medidanan aktual den bon kolaborashon ku Selibon, OLB, e habitantenan di Lagun, ILT, i e ministerionan. Tin konsultanan semanal ku partidonan enbolbíí. ILT a nombra un lider di proyekto lokal pa ehekushon di medida. A enbolbí e manager di programa Duurzaam Afvalbeheer Bonaire (Maneho Duradero di Sushi Boneiru) di OLB, pa sòru ku e solushonnan riba término korto aki ta kuadra ku e maneho riba término largu di Entidat Públiko.
Waya adekuá pa e sentro di sushi
Promé ku fin di aña ainda lo proveé henter e sentro di sushi – inkluso e kaya di medioambiente, stashon di surti sushi, almasenamentu di karton, instalashon di kima sushi, e stashon di residuo di zeta i rekoudashon di sushi kímiko chikí – di un waya adekuá.
Drecha kònteiner ku tin material ku ta kontené asbèst
Aktualmente ta almasenando sushi ku ta kontené asbèst den 19 kònteiner, ku no ta seif pa motibu ku nan ta frusòf tin buraku. Pa motibu ku ora di habri i bolbe paketá e sushi fibra di asbèst por sali, ta bai drecha e kònteinernan. Esaki lo ta kla medio yanüari 2025.
Prosesamentu residuo di bestia di abatuar segun e reglanan korekto
Komo ku no tin un fòrnu di kima sushi ku ta funshoná, ta permití pa dera residuo di bestia di abatuar segun regla, paketá di forma spesial, i na e profundidat korekto na lugánan indiká. Mester indiká e sitionan aki tambe ku eksaktitut.
Enfoke pa eliminashon di sushi biomédiko na un manera seif
Riba e tereno di Selibon Lagun tin 9 kònteiner sin fria ku desperdisio biomédiko . Algun kònteiner ta pará mas ku un aña. Vários di nan ta den mal estado. Eliminashon seif di e sushi biomédiko presente ta rekerí un enfoke spesialisá. Elaborashon di esaki ta tuma tempu. Na e momentunan aki, kòmbersashonnan tokante esaki ta tumando lugá ku spesialistanan na Hulanda. Ademas, tur siman mas sushi biomédiko ta bin aserka for di hospital. Pa e sushi nobo aki lo hasi pedido pa un kònteiner ku ta fria.
Instrukshonnan di trabou pa empleadonanSelibon
E empleadonan di Selibon lo risibí instrukshon di trabou nobo pa prosesamentu korekto i seif di residuo di bestia di abatuar, sushi ku ta kontené asbèst, i sushi biomédiko. Nan lo bai traha mas pronto posibel sigun e instrukshonnan nobo aki.
E siguiente pasonan
Despues di e pasonan konkreto ku a tuma for di medio novèmber, eliminashon di sushi biomédiko na un manera seif tin prioridat na inisio di aña 2025 . Tambe tratamentu di e petishon pa pèrmit di Selibon di aña 2022 ta kontribuí na solushon di e fayonan na Selibon Lagun.
Apelashon
OLB a hasi apelashon serka hues kontra e tumamentu di lugá dor di e wRv. E kaso aki ta bai dilanti dia 10 di yanüari 2025 na Korte Komun di Hustisia (Gemeenschappelijk Hof van justitie).