Lansamentu wèpsait Enviado Hulanda Karibense
Ku lansamentu di e wèpsait ofisial di e gabinete di Enviado www.cabinetspecialenvoy.com e gabinete di Enviado ta duna un bista di e trabou di e Enviado pa Boneiru, Saba i Sint Eustatius. Por ehèmpel, riba e wèpsait por haña tur informashon tokante kon por apliká pa fondo di Union Oropeo. Ademas e wèpsait ta duna informashon tokante e posibilidatnan pa e islanan relashoná ku Nashonnan.
Uní i promoshon di e desaroyo ekonómiko ku Amérika Latino i e área Karibense. Meta di e Enviado ta pa fortifiká e kolaborashon ku Union Oropeo, Nashonnan Uní, Amérika Latino i e islanan Karibense pa asina stimulá un desaroyo ekonómiko duradero di Hulanda Karibense. E temanan mas importante den esaki ta kambio klimátiko, konektividat, siguridat di alimentashon, fuentenan di energia duradero i diversifikashon ekonómiko.
Enviado spesial Edison Rijna: “Ku hopi orguyo nos ta lansa nos wèpsait i nos ta spera ku tur hende na Hulanda Karibense lo hasi uso di e fuente di informashon aki relashoná ku Union Oropeo, Nashonnan Uní i promoshon di relashonnan ekonómiko ku Amérika Latino i e área Karibense. E wèpsait ta destiná pa tur hende ku ke sa mas tokante e aktividatnan di e Enviado, pero tambe spesífikamente pa kompania- i fundashonnan riba e islanan ku ke informashon tokante e posibilidatnan pa bini na remarke pa por ehèmpel supsidio Oropeo. Nos ta invitá bo pa tira un bista riba nos wèpsait nobo i registrá pa nos boletin si bo ke keda informá tokante di e aktividatnan di e Enviado.”
Riba e wèpsait por haña tambe komunikado di prensa i proyekto ku ta tuma lugá. Por ehèmpel kon e Enviado a guia Boneiru, Saba i Sint Eustatius durante e proseso di selekshon di e ’30 for 2030 Project’ di Union Oropeo. 30 isla selektá ta risibí sosten di Union Oropeo pa produsí energia totalmente duradero riba e isla. Boneiru, Sint Eustatius i Saba ta e úniko islanan di Karibe ku a pasa e selekshon.