Start konsulta di internèt pa Areglo di Supsidio pa Inisiativanan Sosial pa Pasado di Sklabitut pa Parti Karibense di Reino
E konsulta di Internet pa areglo di supsidio pa inisiativanan sosial di pasado di sklabitut Transatlántiko pa parti Karibense di Reino a inisiá dia 1 di Mart. Residente di Aruba, Boneiru, Kòrsou, Saba, Sint Eustatius i Sint Maarten por duna nan opinion tokante e propuesta di areglo pa inisiativanan sosial. E konsulta di internèt ta ofresé tur hende e oportunidat pa kontribuí nan pensamentu tokante e areglo aki. E propuesta aki ya a ser diskutí ku vários representante di tur e islanan.
Areglo di Supsidio pa Inisiativanan Sosial di Pasado di Sklabitut
Dia 19 di desèmber 2022, Minister-Presidente a pidi diskulpa na nòmber di e gobièrnu Hulandes. Ademas di e diskulpa, a primintí di pone €100 mion disponibel pa un areglo pa inisiativanan sosial. E parti Karibense di Reino lo risibí 33 mion di esaki i un areglo di supsidio propio. E areglo ta enfoká riba komunidatnan di desendientenan di esklabonan i organisashonnan ‘grassroots’, kaminda por hasi aplikashon pa profeshonalisashon adishonal, inisiativanan pa reforsá komunidat i inisiativanan ku impakto supstansial. Residente di Aruba, Boneiru, Kòrsou, Sint Maarten, Saba i Sint Eustatius, por ekspresá nan opinion riba e proposishon di areglo den nan mes idioma den e konsulta di Internet. Nan por, por eehèmpel, hasi sugerensia pa mehorá e faktibilidat di e proposishon, kaminda ta tuma e konteksto Karibense sufisiente na kuenta. E konsulta di Internet lo kuminsá riba 1 di Mart 2024 pa un durashon di 30 dia i por haña esaki via: www.internetconsultatie.nl/slavernijverledencaribisch. Reakshon ta posibel te ku 31 di Mart, 17:59.
Ora e Konsulta di Internet ta kompleto, e kontribushonnan lo ser prosesá, seguidamente lo kompilá e reakshonnan bon i no bon i prosesá nan den un rapòrt. E areglo di supsidio lo ser firma pa Sekretario di Estado di Ministerio di Asuntunan Interno & Relashonnan den Reino i publiká den "Staatscourant" i den "Staatsbladen" di Aruba, Kòrsou i Sint Maarten. Pa 1 di yüli 2024 e areglo di supsidio pa parti Karibense di Reino lo habri i ta destiná pa inisiativanan sosial enfoká riba konosementu i konsientisashon, rekonosimentu i konmemorashon i un mihó komprendementu di e impakto di pasado di sklabitut i su prosesamentu.
Konsulta di Merkado
Pa 1 di mart tambe lo inisiá un konsulta di merkado pa aberiguá kiko e merkado ta riba tereno di evaluashon di supsidio den e parti Karibense di Reino. Ministerio di Asuntunan Interno & Relashonnan den Reino ta buskando un partido ku konosé ku Karibe i ku akustumbrá traha riba e islanan. Ademas, lo konsiderá e kapasidat di e organisashon, konosementu finansiero i ekspertisio pa ehekutá e asignashon importante i amplio aki. E asignashon tin un tempu di ehèkutashon di máksimo 5 aña. Tantu partido privá komo fundashonnan ku tin un sukursal riba mínimo un di e (isla)nan por apliká. Bo por hasi bo empresa konosí promé ku 10 di Mart 2024 dor di manda un meil na aanbesteding@rijksdienstcn.com. Tambe por pidi mas informashon via e mesun adrès di meil.
Representantenan di e islanan
Aktualmente tin kombersashonnan ku representante di e 6 islanan den parti Karibense di Reino. Pa kada isla e gobièrnu i Kolegio Ehekutivo a nombrá dos representante di 'plataformanan lokal/komité' ku, huntu ku un representante di gobièrnu i e tim di Historia di Sklabitut for di Direktorado-Generál Relashonnan den Reino, lo forma e interpretashon adishonal di 'despues di e koma'. Nan ta duna tambe entrada pa representashon Karibense riba e Komishon di Konmemorashon ku lo establesé, ku lo risibí €8 mion strukturalmente pa aña pa konmemorá e pasado di sklabitut den henter Reino.