Di overòl pa unifòrm di paga kandela
Awe 9 di mart ta dia di historia di kuerpo di bombero. E Kuerpo di Bombero Hulanda Karibense (BKCN) tambe tin un historia riku. Eks Komandante Lokal (Boneiru) Reynold Janga i Komandante Lokal (Saba) Julio Every por konta bo tur kos di esaki. "Den pasado nos no tabatin ni un trahe di paga kandela. Nos tabata hasi tur kos den un overòl ku un hèlmu', Reynolds ta konta.
Departamento di polis
Reynold ta kontinuá: "Nos tabata kai bou di polis promé ku 10-10-10. Ku ademas no a sigui entrenamentu di bombero. Solamente nos tabata stashoná na aeropuerto. Bon mirá nos no tabata kubri henter e isla. Seguridat no tabata mesun importante ku aworakí. No tabatin sèn pa esaki tampoko." "Nos tabata limitá tambe na fondo i na personal. Desishonnan pa e motibu akí tabata kai bou di restrikshon i e enfoke di e departamento no tabata primordial," Julio ta agregá.
Di kandela pa shelu
'Despues di 10-10-10, diripiente nos a bira parti di loke e tempu ei tabata yama Ministerio di Siguridat i Hustisia. E tempu ei mi a traha hopi plan di formashon i maneho. Diripiente tabatin sèn, pues nos por a hasi hopi kos. Ta manera nos a bai di kandela pa shelu,' Reynolds ta konta. Julio ta kontinuá: "Nos kuerpo di bombero awor ta profesionalmente entrená i nos por sigui forma i eduká nos bomberonan. Awor tambe tin sèn pa bon material i ekipo. Tur esaki pa hasi nos servisio pa e habitantenan ainda mas mihó i pa traha na un sosiedat seif."
Insidentenan den kurso di añanan
“Un kandela ku nunka mas mi lo lubidá ta e kandela ku a tuma lugá na Bopec na 2010. El a kima bai durante tres dia. Te hasta un pòmp sumergido a daña di e kayente. Na final nos mester a laga e tankinan di petrolio kima te final," Reynold ta trese dilanti. Julio ta sigui konta: "Tin vários insidente ku mi ta rekordá. Pero e impakto mas grandi ta e pèrdida di un kolega algun aña pasá. A pesar di e impakto emoshonal ku esaki a kousa ami i mi koleganan, nos a keda profeshonal. Nos tabatin un trabou pa hasi i nos a kaba hasi esaki tambe."
Huntu fuerte, huntu seif
Reynold ta komentá: "Ta importante ku personal di brantwer ta sigui rekapasitá i ku ta bini mas kurso den futuro. Hopi desaroyo den komunidat ta rekerí mas rekapasitashon i otro ekipo. Por ehempel, ta konstruí mas i mas edifisio na un nivel mas haltu. E ora ei tin mester di un trùk ku bum. Òf kiko bo ta pensa di tur e vehíkulonan eléktriko? Esaki ta rekeri un expertisio diferente di e bomberonan pa un posibel kombatimentu di kandela." "Loke ami ta haña importante ta ku BKCN ta traha di manera uniforme na tur tres isla. Ku nos ta mantené kooperashon na haltu i asina garantisá un futuro seif i resiliente pa tur hende, "Julio ta finalisá.
