Tanda nobo di kurso di komandante di BKCN a kuminsá
BKCN a kuminsá ku un tanda nobo pa e kurso di komandante. 12 partisipante di e 3 islanan Boneiru, Saba i Sint Eustatius ta sigui e kurso. E ta un kurso intensivo ku ta kana di mart te ku mei 2024 i despues ta bolbe sigui na ougùstùs 2024. Komandante Wayne Maharaj ta un di e instruktornan di e kurso. ‘Na 2016 mi mes a risibí e formashon akí. E ta yena mi ku orguyo ku awor mi por yuda mi koleganan pa bira komandante’, Maharaj ta bisa.
Trayekto di formashon intensivo
Maharaj ta kontinuá: ‘E ta un trayekto di formashon largu i intensivo. E kurso ta konsistí di teoria i práktika. Durante e kurso ta trata e komponentenan Asistensia Tékniko (THV), Aksidentenan akuátiko (WO), Kombatimentu di insidente ku Sustansia Peligroso (IBGS) i Kombatimentu di kandela. Ora nan finalisá e kurso nan ta bira komandante di brantwer di siudat. Es desir, nan no ta komandante di brantwer di aeropuerto ainda. E kurso ei ta sigui despues.’
E tim di sosten di formashon
Huntu ku Ofisial di Servisio (OVD) Glenn Rosaria i komandante Uclaytis Davelaar, Maharaj ta entrená e partisipantenan. Banda di e 3 instruktornan, e Sekshon di Formashon i Práktika BKCN i supervisor di trayekto Julius Melaan ta forma parti di e tim di formashon. Tambe diferente kolega di e 3 islanan ta duna aporte intensivo na e kurso akí. E organisashon ta un operashon enorme. Komo ku riba tur e islanan mester tin sufisiente personal di brantwer pa keda hasi e trabou i garantisá siguridat di e habitantenan. Pero Maharaj tin tur konfiansa: ‘Mi ta entusiasmá. Mi ta sigui motivá e partisipantenan i huntu ku e tim di formashon kompleto nos ta pone – manera mi ta bisa hopi bia - “the best people in the right positions”.’
Un komandante ta duna guia na e personal durante un insidente. E por disidí tambe pa bai riba un eskala mas haltu si e insidente ta mas grandi i tin mester di hasi uso di mas brantwer. E komandante ta keda na mando te ora e Ofisial di Servisio yega. E ta asumí e enkargo e ora ei.