Sera konosí ku e ‘otro’ trahadónan di Douane Caribisch Nederland
Sera konosí ku e “otro” trahadónan di Douane Caribisch Nederland: Silke, Destany, Caprise, i Max. Nan ta e kachónan pa listra di DouaneCN.
E kachónan tur tin un konduktor ku ta guia nan durante nan trabou. E kachónan ta bai kas tur dia ku e konduktor i ta forma parti di e famia di e konduktor. Un persona ku kier bira un konduktor di kachó, primeramente mester disponé di e motivashon deseá i pashon pa traha ku kachó. Traha ku kachónan pa listra ta un “way of life”, paso e konduktor ta responsabel 24/7 pa e kachó pa listra.
E estudio
E konduktor di kachó i kachónan di Douane ta sigui un estudio huntu pa por ehersé e trabou aki. E kachónan ta siña rekonosé un holó partikular i indiká esaki na e konduktor. Durante di e estudio aki e mayoria di e kachónan ta siña pa detektá supstansia narkótiko. E durashon di e estudio ta dependé di kua trabou di investigashon e kachó i e konduktor ta bai hasi despues di e treinen. Tambe e durashon di estudio ta dependé di e eksperensia di e konduktor di kachó. Tin un diferensia entre un konduktor eksperensiá òf un konduktor ku ta bai traha pa promé biaha ku un kachó. Pero en general e durashon di e estudio ta 3 luna. Ta duna e estudio den un sentro di estudio na Hulanda i na momentu ku e kombinashon: konduktor i e kachó ta disponé di e abilidatnan korekto ta sigui un temporada di treinen “on the job”.
Max ta e kolega di mas nobo, el a kaba terminá su estudio na febrüari i ta trahando ku entusiasmo. Dependé di e salú di e kachó, esaki por traha te ku su di 9 pa 10 aña di bida.
