Siguridat di bida i reformanan sentral den Relashonnan den Reino
Mehorá siguridat di bida pa e abitantenan di Boneiru, Saba i Sint Eustatius i palabrashonnan nobo riba kolaborashon den e reformanan ku e paisnan Kòrsou, Aruba i Sint Maarten. Den 2023 esaki tabata e logronan mas importante den e relashon entre Hulanda i e partinan karibense di Reino.
Ménos gastu di bida
Na 2023 a publiká e rapòrt di e Komishon Sosial Mínimo Hulanda Karibense. Parsialmente basá riba e rapòrt aki, e gabinete a disidí di pone 30 mion euro disponibel strukturalmente entrante 2024, pa mehorá e siguridat di bida di abitantenan di Boneiru, Saba i Sint Eustatius. Asina e salario mínimo legal lo oumentá te $1.750 pa luna entrante promé di yüli 2024. Na 2023 a tuma diferente medida pa baha e gastunan di bida. Ehèmpel di esaki ta e mantenshon di e supsidio di energia, e redukshon di gastunan di koriente, awa di bebe i internèt, e supsidio pa e fèri na Islariba i un kontribushon finansiero pa transporte públiko na Boneiru, Saba i Sint Eustatius.
Na 2023 a sera akuerdonan atministrativo ku tantu Sint Eustatius komo Saba. E temanan prinsipal ta inkluí siguridat di bida, desaroyo ekonómiko i teritorial, klima, naturalesa i medio ambiente, bon gobernashon i ampliamentu di e kapasidat di ehekushon.
Kolaborashon duradero riba reformanan
E kuater paisnan den Reino a firma na komienso di aprel 2023 e Areglo Mutuo pa kolaborashon duradero riba reformanan den e sektor públiko den e paisnan karibense. Aruba, Kòrsou i Sint Maarten ta traha huntu ku e Organisashon di Trabou Temporal (TWO).
Na Aruba, entre otro, a yega na un akuerdo riba modernisá e merkado laboral kombiná ku fortifikashon di e siguridat sosial i a sera un akuerdo di kuido pa kontrolá gastu di kuido i vigilá e kalidat di kuido.
Na Kòrsou, na aña 2023, a introdusí e programa 'Mehorá Funshonamentu di Gobièrnu' pa realisá bahada den gastunan di personal i pa fortifiká e kalidat di e aparato gubernamental. A digitalisá e lokèt di pèrmit pa empresario na Kòrsou i a sigui traha pa atendé ku retrasonan den mantenshon di edifisionan di skol.
Na Sint Maarten, na aña 2023 a establesé e kuadro pa reforma amplio den e organisashon di gobièrnu. Fortifikashon di organisashon di gobièrnu, kultura di organisashon i integridat ta sentral den esaki.
Aserkamentu kriminalidat ku ta supminá komunidat
Den 2023, e ministerio di BZK a reservá kasi 18 mion pa atendé ku kriminalidat ku ta supminá komunidat den e parti karibense di Reino. A usa e fondonan aki pa amplia e kapasidat di Recherche Samenwerkingsteam (RST), e Ministerio Públiko di Kòrsou, Sint Maarten i Hulanda Karibense, e Ministerio Públiko di Aruba i e Korte Komun di Hustisia. Na 2023, a kuminsá ku ehekushon di e promé proyektonan basá riba plannan di maneho ku a prepará huntu. Manera desaroyá kampañanan di konsientisashon, hür kapasidat legislativo i establesé imágennan di supminamentu.
Rekonstrukshon di Sint Maarten
E rekonstrukshon di Sint Maarten, despues di e destrukshon di orkan Irma na 2017, ta progresando konstantemente. E resultadonan di e invershonnan via e ‘trustfonds Wederopbouw Sint Maarten’, finansiá pa Hulanda i manehá pa ‘Wereld Bank’, ta bira mas visibel. E kantidat total di e proyektonan di e ‘trustfonds’ tabata mas ku $443 mion na fin di 2023. Un total di 12 proyekto a risibí sèn for di e ‘trustfonds’ den 2023. Tambe ‘Wereld Bank’ a habri un ofisina lokal na Sint Maarten na 2023, loke ta permití e Banko pa traha mas efektivo ainda.
Reino kompletu: Programa di Pasado di Sklabitut i Fondonan di Kolaborashon Karibense
Dia 1 di yüli 2023 a kuminsá ku e aña di konmemorashon di pasado di sklabitut. Den estrecho kolaborashon ku e islanan, Aruba, Boneiru, Kòrsou, Sint Maarten, Saba i Sint Eustatius a organisá un konmemorashon riba 1 di yüli. Na kada isla tabatin un persona di gobièrnu presente. Riba 3 di òktober, sekretario di estado Alexandra van Huffelen a deklará na nòmber di e estado hulandes ku Kòrsou a rehabilitá e héroe di libertat i resistensia Tula. A transferí archivonan di pasado di sklabitut pa Archivo Nashonal di Aruba. Aki nan ta bai sigui ku e proseso pa skèn e archivonan ku manuskrito antiguo.
E ministerio di BZK a kontribuí ku 0,5 mion euro na e programa nobo ‘Samenwerkende Fondsen Cariben’ di Oranjefonds pa inisiativanan sosial den e parti karibense di Reino. E programa ta dirigí riba inisiativa ku ta yuda famianan den sirkunstansia vulnerabel. Organisashonnan sosial riba e seis islanan por hasi uso di e fondo.