Komishon di Relashonnan den Reino ta hasi un bishita di trabou na área karibense
For di djadumingu 5 di mei te ku djaweps 9 di mei 2024, e komishon di Relashonnan den Reino di Tweede Kamer der Staten-Generaal ta hasi un bishita di trabou na Saba, Sint Eustatius i Sint Maarten. E bishita di trabou ta den kuadro di un promé enkuentro pa e boseronan nobo sera konosí ku e islanan. Ta papia tokante temanan manera desaroyo ekonómiko, durabilidat, enseñansa, kuido di salú, bibienda i e pasado di sklabitut.
E delegashon ta konsistí di e miembronan di Tweede Kamer:
W. Paulusma D66 (Presidente di e komishon fiho pa Relashonnan den Reino)
J.P. van Haasen (PVV)
R.J. White (GroenLinks/PvdA)
I.J.M. Michon-Derkzen (VVD)
F.H. Bruyning (NSC)
Ta e intenshon pa na kuminsamentu di 2025 e miembronan di komishon bishitá e otro tres islanan di e parti karibense di Reino (Aruba, Kòrsou i Boneiru) den kombinashon ku e Konsulta Interparlamentario di Reino.
Resúmen kòrtiku di e programa:
Djadumingu 5 di mei – Biahe Amsterdam-Sint Maarten-Saba.
Djaluna 6 di mei – Saba: diferente enkuentro i bishita relashoná ku e tema di desaroyo ekonómiko, bibienda, durabilidat i pasado di sklabitut.
Djamars 7 di mei – Sint Eustatius: diferente enkuentro i bishita relashoná ku e tema di kuido di salú, enseñansa i pasado di sklabitut.
Djárason 8 di mei i djaweps 9 di mei – Sint Maarten: diferente enkuentro i bishita relashoná ku e tema di bibienda, rekonstrukshon despues di orkan, desaroyo ekonómiko i konektividat sosial. Biahe di regreso pa Hulanda (yegada riba djabièrnè).