Oumento poblashon Hulanda Karibense na 2023 ku kasi mil persona

Notisia | 30-05-2024 | 20:01

Poblashon Boneiru na 2023 a krese ku mas ku 1.000 persona

Boneiru tabatin 25.133 abitante dia promé di yanüari 2024, 1.043 mas (4 porshento) ku un aña anterior. E motibu pa esaki tabata prinsipalmente dor ku tabatin muchu mas hende ku a bai biba na Boneiru ku hende ku a bai for di e isla (941), i te na un kantidat limitá dor di kresementu natural (98, e kantidat di hende ku a nase ménos e kantidat di hende ku a fayesé). E kantidat di hende na Boneiru ku a nase pafó di Hulanda Karibense a krese ku mas ku 1.000 persona. E motibu pa esei tabata prinsipalmente ku tabatin mas hende bibá ei ku a nase na Repúblika Dominikana, Colombia, Venezuela, i Hulanda Oropeo.

Kantidat di abitante di Sint Eustatius a baha ku 89 persona

Dia promé di yanüari 2024, Sint Eustatius tabatin 3.204 habitante, 89 (3 porshento) ménos ku na kuminsamentu di aña 2023. E motibu pa esaki tabata prinsipalmente ku tabatin mas hende ku a bai for di e isla ku hende ku a bai biba ei. E kresementu natural tabata limitá. E kantidat di hende na Sint Eustatius ku a nase pafó di Hulanda Karibense a baha ku 65. Prinsipalmente e kantidat di hende ku a nase na Hulanda Oropeo, na Merka i na Repúblika Dominikana a baha.

Poblashon di Saba a krese ku 25 persona

Dia promé di yanüari 2024, Saba tabatin 2.060 habitante, 25 (1 porshento) mas ku un aña promé. Tabatin mas hende ku a bai biba na e isla ku hende ku a bai for di dje (60). E kresementu natural tabata limitá. E kantidat di hende na Saba ku a nase pafó di Hulanda Karibense a oumentá ku 34 persona. Esaki ta prinsipalmente hende ku a nase na Sentro- i Suramérika.