Sekretario di estado di Hustisia i Siguridat riba bishita di trabou
Sekretario di estado Eric van der Burg di Hustisia i Siguridat ta hiba un bishita di trabou na Boneiru, Saint Kitts, Sint Eustatius, Saba i Sint Maarten. E lo permanesé di 4 te ku 8 di yüni den e área karibense.
Na Boneiru Van der Burg ta hasi apertura di un edifisio nobo pa detenshon di estranhero den Instituto Hudisial Hulanda Karibense. E lo hiba kombersashon ku kolegio ehekutivo di Boneiru.
For di Saint Kitts Van der Burg lo kontinuá su bishita di trabou pa Islanan Ariba. Na Sint Eustatius e sekretario di estado lo bai mira ku propio wowo kon kontrol di frontera pa hendenan ku ta biaha pa e isla ta kana. Tin un kombersashon entre Van der Burg i e hefenan di servisio di Imigrashon i Naturalisashon i di Asuntunan Sosial i Empleo. Tambe tin un enkuentro ku gezaghèber Alida Francis i e otro miembronan di kolegio ehekutivo di Sint Eustatius.
Na Saba tin kombersashonnan bilateral planiá ku gezaghèber Jonathan Johnson. Tambe tin un enkuentro entre e sekretario di estado i kolegio ehekutivo di Saba. E sekretario di estado ta regresá Hulanda via Sint Maarten i asina ta klousurá su bishita di trabou.