Spich Representante di Reino na seremonia di Konmemorashon di defuntu 4 di mei 2024
Awe nos a reuní aki pa konmemorá e víktimanan di Segundo Guera Mundial i di otro konflikto i operashon di pas.
![Directeur RCN en Rijksvertegenwoordiger](/binaries/medium/content/gallery/rijksdienstcn-nederlands/content-afbeeldingen/rv/rv-dodenherdenkin-4-mei-1920x600.jpg)
Manera tur aña, e Komité Nashonal ta skohe un tema riba 4 i 5 di mei. Tur konmemorashon ku organisá den Reino por partisipá. Ku e tema, mundialmente e Komité kier konektá evento históriko ku aktualidat. E tema di e aña aki ta: 'Libertat ta konta, preparashon pa 80 aña di libertat'.
Nos ta para aki na e monumento, nos ta honra e 129 víktimanan Antiano di guera. Kiko nos sa di nan historia? E relato di e storianan di guera ta tuma lugá mayoria biaha for di e perspektiva di Hulanda Oropeo i masha poko tokante di e embolbimentu di e abitantenan di Boneiru, Saba i Sint Eustatius. E storianan hulandes aki pa e islanan hopi biaha ta storia anónimo sin kara. Sinembargo, e Segundo Guera Mundial a konosé víktima aki tambe. Motibu pa mi pa puntra señor Boi Antoin pa bai den su archivo amplio pa asina e konmemorashon aki tambe haña un mihó kara i ta mas atraktivo.
Mi ke konta bo e storia di e famia Martijn. E víktimanan di guera ku a kai na Boneiru, a kai riba laman, prinsipalmente laman karibense.
Tres miembro di e famia Martijn a fayesé riba laman pa motibu di akto di guera. Hopi hòmber Boneriano tabata traha komo marinero riba barku di Lago Shipping (Esso), e kompania di nabegashon di Kòrsou (Curaçaose Scheepvaart Maatschappij, CSM) òf riba barku di komersio di KNSM (Koninklijke Stoomboot Maatschappij).
For di e famia Martijn, salí for di Antriol, tabatin tres hòmber ta nabegá na momentu ku e di dos guera mundial a kuminsá:
- José Bernardo Martijn tabata un pionero na bordo di e tènker ORANJESTAD momentu ku e supmarino Aleman U-156 a torpediá esaki den e mainta trempan di 16 di febrüari 1942 pega ku kosta di Aruba. E a biba solamente 33 aña.
- Olivero Dominico Martijn tabata un matros na bordo di TIA JUANA - un tènker di Lago shipping. E supmarino Aleman U-502 riba e mesun dia aki, ku un disparo, a torpediá e tènker aki tambe pega ku kosta di e lago di Maracaibo (Venezuela). E a biba solamente 31 aña.
- Dominico Martijn tabata komo pionero maestro na bordo di e tènker Punta Gorda di Lago Shipping. E barku aki a dal den e barku belga APETCO II riba 18 di sèptèmber 1944. Esaki a sosodé nort di Cabo San Roman pega ku kosta di Venezuela, pa motibu ku tur dos barku mester a nabegá sin lus pa evitá ku supmarino di e enemigu lo ta atento riba nan. Dominico a biba solamente 26 aña.
Di e forma aki e famia Martijn a pèrdè tres miembro di su famia. Tur tres a haña un tumba di marinero na un edat muchu yòn komo resultado di e guera aki. E storia di e famia aki ta simbolisá pa mi e sufrimentu ku e islanan tambe a pasa aden. E tragedia personal aki pa e famia, i asina pa hopi otro famia, ta hasi sentido pa pensa riba e desgrasia ku guera ta kousa. Mi ta spera ku dor di konta e storia aki, nos por duna nos konmemorashon riba nos islanan un kara.
E tres hòmbernan aki a duna nan bida pa nos por i mag biba liber awe.
Kompletamente lòs for di e storia aki mi ke hasi e siguiente remarke. Pa motibu ku, e libertat ku nos tin awe no ta algu dimes, pensa riba tur e personanan ku ainda ta biba den guera ku otro. Pero pensa tambe riba tur e hendenan ku no por òf no ta tribi di ekspresá su opinion den libertat. Mi ta pensa riba e preshon sosial ku hende ta eksperensiá, ku ta hasi ku e persona no ta tribi mas di ekspresá su opinion, òf ta ekspresá su opinion (mas tantu) di forma anónimo solamente riba retnan sosial.
Riba e dia spesial aki pa mi, mi ta pensa tambe riba e derechonan humano ku te ainda tur dia ta violá. E derecho- i libertatnan ku nos ta eksperensiá ta eksepshonal, spesialmente pa e hendenan ku ainda mester bringa pa esaki diariamente i ta biba den miedu. Laga nos hasi nos esfuerso pa papia tokante di nos diferensia. No por ta asina ku no ta skucha hende ku tin un opinion diferente. E no mag i no por ta asina ku no ta aseptá òf skucha hende ku otro aparensia òf komportashon.
Nos islanan ta konsistí di un komunidat diverso, ku diversidat komo un balor grandi den kua nos por i mester fortifiká otro. Aki nos ta biba den libertat di tin un opinion diferente òf ta diferente. Riba un dia manera awe, laga nos pensa riba e echo ku esaki ta aparentemente normal pa nos. Pero ku ta algu spesial pa tur persona na kualke parti di mundu ku ta lucha ainda pa pas, libertat òf e derechonan humano aki.
Mi ta spera ku awe, ku e storia di e famia Martijn, e guera a haña un kara Boneriano. Pa nan, e sikatrisnan lo keda semper palpabel. Nan a kontribuí na e libertat ku nos lo selebrá huntu ku otro mañan.
Laga nos konmemorá awe tur ku a duna su bida pa nos libertat. Pas i libertat no ta algu dimes. Nos mester sigui traha huntu riba esaki. Nos ta hasi esaki dor di e konmemorashon di awe, pero mas importante ainda, nos mester sigui traha huntu riba esaki tur dia. Laga nos konmemorá huntu den konekshon, kada ken ku su propio memoria i pensamentu.