Eksitoso “Integrity Summit Dutch Caribbean 2024” na Sint Eustatius
Representante di organisashon di tur e seis islanan di Hulanda Karibense i di Ministerio di Asuntunan Interno i Relashon di Reino (BZK) tabata di 4 te ku 6 di novèmber na Sint Eustatius pa e di dos “Integrity Summit Dutch Caribbean 2024”.
Meta di e kumbre tabata pa siña di otro i interkambiá konosementu. Partisipantenan a brasa e idea pa lanta un ofisina Hulanda Karibense pa promoshon di integridat, pa suministrá knowhow i ekspertisio na e islanan. Ta bai studia e posibilidat pa lanta un ofisina asina.
E parti mas important
“Integridat mester ta pará sentral serka tur miembro di nos komunidat, pa kuminsá serka organisashonnan gubernamental”, Alida Francis, gezaghebber di Sint Eustatius a deklará, durante su diskurso inougural.
Segun Francis, tabata di gran importansia pa organisá e kumbre, pa desaroyo di e tópiko akí na Sint Eustatius pa duna un impulso na e diferente aktividatnan ku tin planiá e añanan benidero. Resientemente a lanta un ofisina di integridat na Sint Eustatius ku lo bai fasilitá tambe un programa di entrenamentu amplio pa gobièrnu lokal.
Durante e kumbre di integridat partisipantenan a profundisá riba tópikonan spesífiko. Tabatin hopi tópiko riba agènda, manera promoshon di un kultura konsiente di integridat, trahamentu ku análisis di riesgo i konseheronan konfiabel.
Mihó práktika
E énfasis tabata riba ekspertisio interno. Funshonarionan di integridat eksperensiá di diferente isla a kompartí nan konosementu, mihó práktika i lèsnan ku a siña.
Ministerio di BZK a fasilitá e kumbre na Sint Eustatius, den kolaborashon ku SRA-Caribbean & Partners NV, un ofisina lokal spesialisá den entrenamentu i asesoramentu riba tereno di integridat i kumplimentu, i Nyenrode Business Universiteit.
E partisipante- i organisadónan ta deseá di sigui ku un agènda komun. “Nos ta realisá ku kapasidat operashonal ta limitá riba e islanan. Pero no mester inventá maneho i struktura di nobo. Mas kolaborashon por ta efektivo i por empoderá e islanan.”
Premio di integridat
A duna atenshon spesial na e trabou di Jeaninne Wong-Loi-Sing, konsehero di integridat na Rijksdienst Caribisch Nederland (RCN). Riba 14 di òktober 2024 Wong-Loi-Sing a risibí e Premio di Integridat Ien Dales’ (Ien Dales Integrity Award) 2024. Na Hulanda ta otorgá e premio prestigioso akí na personanan ku ta hasi efsuerso ekstraordinario pa promové integridat den e sektor públiko. Wong-Loi-Sing a kompartí su eksperensia ku partisipantenan na e kumbre na Sint Eustatius.
Balor agregá
Partisipantenan tabata di akuerdo ku lantamentu di un ofisina Hulanda Karibense pa promové integridat tin un balor agregá. E ofisina akí lo yuda e islanan inventarisá posibilidatnan di entrenamentu, desaroyá un kampaña di konsientisashon, kompilá e mihó práktikanan i organisá seshonnan di promoshon di ekspertisio. BZK a ofresé pa kontratá un lider di proyekto pa sigui desaroyá e idea akí.