Representante di Reino suplente tin e intenshon pa temporalmente tuma ofer e tareanan di pèrmit, supervishon i mantenshon na Selibon

Notisia | 13-11-2024 | 14:49

(Lesa aki e teksto di e mensahe di video)

Bon tardi,

Awe mainta mi a informá Kolegio Ehekutivo ku mi tin e intenshon pa tuma nan tareanan temporalmente ofer pa loke ta trata e problema di sushi na Boneiru.

Esaki ta un desishon drástiko, pero nesesario
Gustosamene lo mi ke splika esaki: 

Pa hopi aña kaba tin hopi preokupashon tokante prosesamentu di sushi na lèntfel Lagun. Habitantenan tabatin reklamo di mal holó, problema ku salú i aire kontaminá.
For di investigashon anteriormente ya tabatin resultadonan preokupante: habitantenan ta kronikamente eksponé na mal holó, emishon di aire kontaminá i huma di gas di kombustibel ku no ta kompletamente kimá. P’esei Selibon for di aña pasá kaba a para operashon di e fòrnu.

Na inisio di aña tabata tin vários kandela na lèntfel. E biaha ei tambe ya kaba a eksponé habitantenan na aire kontaminá. Algun di nan mester a te asta bandoná nan bibienda.

Despues di e kandelanan ‘Inspectie Leefomgeving en Transport – ILT’ a hasi investigashon di e proseso pa duna pèrmit, supervishon i mantenshon dor di Entidat Públiko Boneiru.
Mi a risibí e rapòrt dia 21 di òktober – mas o ménos tres (3) siman pasá.

E konklushonnan ta alarmante:
E riesgo pa kontaminashon di aire, awa i suela ta krese kada siman. Foko di kandela bieu bou di tera ainda ta sigui kima poko poko. I sustansianan peligroso manera asbèst, sushi biomédiko i sobrá di karni di matadero ku no ta prosesá na un manera korekto i seif. For di un otro investigashon a sali na kla ku awa di laman i fondo di laman na Lagun ta seriamente kontaminá, entre otro ku metalnan peligroso.

Inspekshon ta mira riesgo signifikante pa salú di hende, bestia i naturalesa.
Tambe nan a konstatá ku no a duna Selibon pèrmit ku ta kubri molèster òf medio ambiente (segun ‘Wet Vrom BES’). Entidat Públiko Boneiru su supervishon i mantenshon no tabata na òrdu pa añanan largu. Lamentablemente tampoko no a duna importansia na e señalnan tokante di e situashon na tempu.

Segun Inspekshon e situashon aktual ta preokupante, kompliká i urgente. 
Naturalmente mi a kompartí e rapòrt di inspekshon inmediatamente ku Kolegio Ehekutivo i a pidi nan un reakshon. Mi a indiká tambe ku aki tin posibel negligensia di tarea dor di e entidat públiko. 

Den nan reakshon riba e rapòrt – un (1) di novèmber – Kolegio Ehekutivo a indiká ku nan ta kompartí e konklushonnan di e rapòrt. Tambe e kolegio a indiká ku Selibon NV no ta kapas pa solushoná esaki na un manera duradero i struktural. E kolegio ta indiká tambe ku Selibon no tabatin su maneho di empresa na òrdu i ku Entidat Públiko Boneiru no a kumpli ku su obligashon di dunamentu di pèrmit, supervishon i mantenshon. E kolegio ehekutivo a anunsiá un kantidat di akshon konkreto, pero ta indiká tambe ku invershonnan grandi ta nesesario pa esaki.

Mientrastantu siman pasá, un biaha mas tabatin kandela na lèntfel. Kuerpo di bombero a hasi un tremendo trabou. Na wowo di angua nan a evitá ku tankinan di zeta a pega kandela òf eksplotá. Boneiru a skapa di un desaster. Pero e biaha aki tambe hopi habitante mester a bandoná nan kas.

E último kandela aki a kondusí na mas inkietut. No ta pòrnada Konseho Insular mesora a tene un reunion urgente. E emoshon- i preokupashonnan ta grandi.
No solamente habitantenan, uní den Pro Lagun. Henter Boneiru ta preokupá pa nan salú, e bienestar di bestia i naturalesa, medio ambiente i e konsekuensianan pa ekonomia. Boneiru ta orguyoso di su reputashon komo blue destination. I meresidamente.
Pero e situashon na Selibon sinembargo ta kompletamente kontradiktorio di esaki.

Ademas e riesgo pa mas kandela ta grandi.
Pa motibu ku ainda tin restunan di foko di kandela bou di tera ku ta kima poko poko.

Intervenshon rápido i determiná ta apsolutamente nesesario. Pero Selibon i entidat públiko no por hasi esaki nan so.

Diferente Kolegio Ehekutivo no a logra den e intento pa solushoná e problema di sushi.
E pregunta ta asta, si e forsa laboral, medionan i ekspertisio ta presente mes riba nos bunita isla. E situashon aktual en todo kaso ta asina kompliká, ku sigur e ta surpasá konosementu i kapasidat na e entidat públiko.

Komo Representante di Reino suplente mi ta yega na e konklushon ofisial ku nos ta papia di negligensia di tarea dor di Entidat Públiko Boneiru.

P’esei mi intenshon pa tuma e tareanan ofer (“voornemen om in plaats te treden”), manera e nòmber ofisial ta. Mi ta hasi esaki basá riba mi outoridat manera ta pará den “Wet op de Openbare Lichamen Bonaire, Sint Eustatius en Saba (WolBES)”. 

Konkreto esaki ta nifiká lo siguiente: 
Komo Representante di Reino suplente mi ta tuma ofer e parti di dunamentu di pèrmit, supervishon i mantenshon na Selibon temporalmente for di e kolegio ehekutivo.
Pa tur otro tarea e entidat públiko ta mantené su outoridat kompleto.
I e empleadonan di Selibon ta sigui rekohé bo sushi, manera kustumber.

Naturalmente e kolegio ta haña oportunidat pa duna su punto di bista tokante esaki. 
Despues lo mi tuma un desishon definitivo. Lo mi hasi esaki e siman aki mes.

Kon e proseso lo sigui despues?
Si akaso mi tuma e desishon ofisial pa tuma e tareanan ofer, ‘Inspectie Leefomgeving en Transport – ILT’ lo kuminsá atendé ku e situashon na Lagun. Esaki mester tuma lugá den kolaborashon estrecho ku empleadonan di Selibon, ku habitantenan di Lagun i besindario i ku Kolegio Ehekutivo i ámtenarnan di Entidat Públiko Boneiru. Mi ta haña e kolaborashon estrecho aki hopi importante. Nos tin un problema konhunto i konhuntamente nos mester solushoná esaki tambe.

E diferente ministerionan ta pará kla pa yuda ku esaki.
No solamente pa e problemanan urgente aktual, manera limpia sushi di matadero i hòspital.
Pero tambe pa haña un solushon duradero pa e problema di sushi.

E intervenshon aki ta un medida hopi pisá, mi ta komprondé esei hopi bon. Ta e último medida ekstremo segun lei ku mi por implementá. I esaki kisas ta lanta emoshonnan fuerte.
Pero awor aki e ta nesesario.

P’esei laga mi ta hopi klá:
E medida aki no ta bisa nada di e embolbimentu di kolegio ehekutivo i ámtenarnan di e entidat públiko. E no ta bisa nada tampoko di esfuerso di tur e personanan ku ta traha na Selibon. Tur dia nan ta traha duru pa mantené nos isla limpi – i nan ta hasi esei ku hopi entusiasmo.

Pero awor aki e problema ta asina kompliká i urgente, ku nos mester intervení rápido.
Mester bini un solushon duradero pa e problema di sushi. Selibon i entidat públiko no por hasi esei nan so.

Mi ta hasi 2 promesa hopi konkreto na ‘bo:
E promé ta ku e intervenshon aki lo no dura mas largu ku ta estriktamente nesesario.
Pues, te na momentu ku tin un bista di un solushon duradero i e entidat públiko por ehekutá su tareanan rondó di prosesamentu di sushi independientemente. 

Pero nos mester ta hopi realístiko tambe:
E situashon kompliká i peligroso aktual a surgi den un periodo di años. Pues e no ta algu ku por solushoná mañan tampoko: al kontrario. E temporada benidero nos lo tin ku traha hopi duru huntu pa mehorá e situashon stap pa stap.

P’esei mi ta hasi e segundo promesa:
Nos lo informá bo debidamente tokante tur akshon ku ami, huntu ku tur e diferente instansianan, lo tuma.

I mi ta pidi boso tur pa konfia ku huntu nos lo traha hopi duru riba un solushon duradero.

Pasó esei Boneiru meresé.
I esei abo tambe meresé.