Promé pasonan di Representante di Reino suplente na Selibon Lagun
Dia 15 di novèmber, Representante di Reino suplente (wRv) ku efekto inmediato a tuma lugá di Kolegio Ehekutivo di Entidat Públiko Boneiru (OLB) pa sierto tarea relashoná ku Selibon Lagun. Den su rapòrt di inspekshon, ILT a konstatá ku OLB tabata neglishá algun tarea relashoná ku Selibon Lagun pa basta tempu kaba, ku riesgonan grandi pa salubridat públiko, naturalesa i medio ambiente komo konsekuensia. P’esei, Representante di Reino suplente (wRv) a disidí ku no por warda mas ku korekshon di e violashonnan konstatá, sigur mirando e intrankilidat i e kandelanan. Huntu ku Selibon, OLB, habitantenan di Lagun, ILT i e ministerionan, awor ta tumando e promé pasonan.
Mester atendé e violashonnan ku e rísikonan di mas urgente riba término kòrtiku. Ta trata partikularmente di almasenahe di desperdisio biomédiko den kònteiner sin fria, i dera sobrá di karni di matadero. Tambe ta trata di almasenahe di material ku ta kontené asbèst, falta di midi emishon na e instalashon pa kima sushi, i pone waya rondó di e tereno.
Aserkamentu spesialisá
E trayekto aki ta rekerí un aserkamentu spesialisá, i lo dura algun siman pa organisá esaki. Komo promé paso, tabatin inspektornan di supstansia peligroso di ILT na Lagun. Nan a bolbe hasi kòntròl entre otro na Selibon i a hasi un inventarisashon di e situashon aktual.
A base di e reinspekshon aki, den e siman ku ta tras di lomba a hiba diferente kòmbersashon pa hasi palabrashon tokante kolaborashon pa ehekutá e aserkamentu spesialisá aki. Huntu ku e ekspertonan mas enbolbí i OLB, a hiba kòmbersashonnan tokante prevenshon di daño mas aleu i un aserkamentu seif pa protehá medio ambiente, salubridat públiko, i naturalesa.
Transparensia
E Representante di Reino suplente (wRv) a primintí ku e lo informá tur esnan enbolbí debidamente tokante tur e akshonnan ku e ta bai tuma, huntu ku tur e diferente instansianan. E lo hasi esaki via di komunikado di prensa regularmente, duna splikashon na Konseho Insular, kòmbersashonnan semanal ku direktor di Selibon, ku Pro Lagun, i ku Kolegio Ehekutivo.
Representante di Reino suplente (wRv) ta komprometé na informá Konseho Insular, i a invitá nan pa un splikashon tokante e pasonan ku a tuma kaba.
Huntu nos ta sigui traha riba un lèntfel seif, prepará pa futuro. Boneiru meresé esei.