Sekretario di estado ta informá Parlamento tokante konsekuensianan di vensementu di supsidionan Hulanda Karibense
Riba promé di yanüari 2025 un kantidat di supsidio adishonal pa habitantenan di Boneiru, Sint Eustatius i Saba ta vense. Ta trata di e kompensashon pa energia pa personanan ku entrada mas abou i e kontribushon pa elektrisidat i awa pa bebe. E supsidionan akí tabata un kompensashon temporal pa mantenshon di bida, banda di oumentu di e entrada mínimo.
Den un karta pa Tweede Kamer sekretario di estado Szabó ta informá ku gabinete ta konsiente ku e gastunan di utilidat lo bai subi. Ta trata di un subida di minimal 40 dòler pa elektrisidat i 6 dòler pa awa. Pa e kompensashon di energia e lo ta mas òf ménos 108 dòler pa luna. Sinembargo e oumento ta keda limitá, pa motibu ku algun supsidio lo kontinuá den 2025. Por ehèmpel ta mantené e kompensashon pa internèt i telefòn i tin rekursonan pa hasi transporte públiko posibel. Banda di entradanan mínimo mas haltu, a baha tambe e primanan di dunadónan di trabou.
Gabinete ademas tin plan pa tuma mas medida pa sostené personanan ku entradanan mas abou riba e islanan. Den primavera gabinete ta disidí di ki manera lo por hasi uzo efisientemente di demas rekursonan di forsa di kompra. Pa esaki gabinete a reservá en total 9,5 mion euro èkstra. Ku esaki por apsorbé entrante primavera e efektonan mas negativo di e oumento di kosto partikularmente pa e personanan ku entrada mas abou. Mas lat e aña akí gabinete ta manda un karta pa Parlamento ku e reakshon di gabinete riba e rapòrt di e komishon Mínimo Sosial Hulanda Karibense.
Amiendanan relashoná ku tratamentu di presupuesto di Relashonnan den Reino
Den e mesun karta aki e sekretario di estado ta reakshoná riba e tres kambionan presupuestario proponé. Ta trata di dos amienda pa mantené e supsidionan temporal, hinkando mas plaka den e fondo di BES. Un amienda ta trata di traspaso di 800.000 euro destiná pa gastunan di implementashon di e programa di pasado di sklabitut, pa Koninklijke Marechaussee (KMar).
Sekretario di estado Szabó ta deskonsehá e promé amiendanan menshoná, pa motibu ku e fondo di BES no ta finansiá un parti di e supsidionan ku ta bai vense. Ademas, si skrap e rekursonan akí (7 mion euro) for di e presupuesto di Relashonnan den Reino, esei ta nifiká ku lo no por implementá otro maneho ku ta importante tambe pa e islanan. Mas aleu e mandatario ta duna di konosé ku e tin intenshon pa finansiá e rekursonan nesesario pa ampliashon di kapasidat di KMar for di su propio presupuesto, si KMar hasi un apelashon riba esei.