Stashon di tera Galileo na Boneiru entregá ofisialmente na Union Oropeo
Awe 28 di novèmber un momentu spesial a tuma lugá na Boneiru ku e traspaso ofisial di e promé stashon di sensor Galileo (GSS) riba teritorio di Boneiru. E Ministerio di Infrastruktura i Maneho di Awa (IenW) a entregá e stashon avansá akí, un parti di e sistema di satélite Oropeo Galileo, ofisialmente na e Agensia di Programa Espasial di UO (EUSPA).
Entrega di yabi di e Stashon di tera Galileo
Durante e seremonia, Afke van Rijn, Director General di Ministerio di Infrastruktura i Maneho di Awa (IenW), a hasi entrega ofisial di e yabina Guerric Pont, Gerente di Programa Galileo na EUSPA. Despues di e traspaso, EUSPA ta bai operashonalisá e stashon di manera ku na fin di aprel/komienso di mei 2025 e por ta operashonal. Representantenan di organisashonnan lokal i internashonal, inkluso diputado Clark Abraham, CEO di WEB i otro stakeholdernan, a asistí na e seremonia.
Kiko ta un stashon di sensor Galileo?
E stashon GSS ta hunga un ròl importante den e sistema di satélite Galileo ku ta ofresé nabegashon i definishon di tempu konfiabel rònt mundu. E stashon na Boneiru ta risibí señal for di satélitenan di Galileo i ta prosesá e datonan pa aplikashonnan manera nabegashon i lokalidatnan di presishon.
Un proyekto lokal i internashonal
GSS ta un stashon di tera sin tripulashon i ta konsistí di un edifisio ku servernan, tres antena (sensor), dos disko di komunikashon ku satélite i un tereno kompletamente sigurá ku hèki,i kámara i un warda di vigilansia ku seguridat 24/7. Kontratistanan lokal a realisá e konstrukshon, importando instalashonnan tékniko di kalidat haltu for di Oropa. E proyekto ya a kontribuí kaba na empleo na Boneiru i ta garantisá por lo ménos 10 kupo di trabou fultaim den servisio operashonal pa e próksimo 20 aña.
Koperashon
E realisashon di e stashon GSS ta resultado di koperashon estrecho entre partidonan lokal i internashonal, inkluyendo Ministerio di Infrastruktura i Maneho di Awa, Rijksvastgoedbedrijf, entidat públiko Boneiru (OLB), Kompania di Awa i Elektrisidat (WEB), Rijksdienst Caribisch Nederland (RCN) i kompanianan lokal.
E stashon di tera Galileo ta marka un paso importante den koperashon entre Hulanda i Oropa riba tereno astronóutika i ta fortalesé e ròl di Boneiru den inovashonnan teknológiko internashonal, pero tambe den futuro desaroyo di e isla.
