Habitantenan di Hulanda Karibense ta satisfecho, pero tin preokupashon tokante sèn

Notisia | 29-11-2024 | 20:33

Prosperidat amplio ta tokante e kalidat di bida akinan i awor, i e grado te kon leu esaki ta perhudiká prosperidat amplio di generashonnan ku ta bini despues, òf di hende na otro parti di mundu. E monitòr tokante Hulanda Karibense ainda ta den desaroyo i e aña aki, ta kontené e dimenshon ‘awor mes’ i nuebe di e diesshete Sustainable Development Goals (SDG, Meta di Desaroyo Sostenibel). Enfoke di e monitòr ta riba e periodo di 2016-2023. 

Boneiru tin 25,1 mil habitante. Na Saba i Sint Eustatius tin 2,1 i 3,2 mil hende ta biba.

E satisfakshon ku bida na Hulanda Karibense tabata relativamente haltu, pero tin ménos hende ku ta satisfecho ku nan propio situashon finansiero. Na 2021, 75 porshento di e habitantenan di Boneiru tabata satisfecho ku nan situashon finansiero, na Sint Eustatius 70 porshento i na Saba 62 porshento. Parti di e poblashon a indiká di tin problema pa manehá sèn: 20 porshento di e habitantenan di Boneiru, 23 porshento di e habitantenan di Saba i 32 porshento di e habitantenan di Sint Eustatius. Tambe, na 2022, 25 porshento di e muchanan menor di edat na Boneiru i Saba tabata kore e riesgo di kai den pobresa. Na Sint Eustatius esaki tabata 28 porshento. Entre 2021 i 2022 e porsentahe aki a subi na Boneiru. 

Diferensianan di entrada relativamente grandi
E entrada promedio na Hulanda Karibense na aña 2022 tabata mas o ménos entre 60 i 70 porshento di e entrada promedio na Hulanda Oropeo. E entrada disponibel na Saba a oumentá bira 23,8 mil dòler; na Sint Eustatius (21,2 mil dòler) i na Boneiru (19,5 mil dòler) esaki tabata stabil.

Miéntras ku e prosperidat material ta relativamente abou, e desigualdat di entrada ta relativamente grandi. E 20 porshento di kas di famia ku e entradanan di mas haltu, na 2022 tabatatin 7 pa 9 biaha mas tantu na entrada ku e 20 porshento di kas di famia ku e entradanan di mas abou. E desigualdat di entrada aki ta bahando solamente na Sint Eustatius. Na Hulanda Oropeo, na aña 2022 e grupo ku e entrada di mas haltu a gana 4,1 biaha mas tantu ku e grupo ku e entrada di mas abou. 

Hopi hende ku tin trabou

E prosperidat material ta relativamente abou, apesar di e partisipashon laboral haltu. Na Sint Eustatius i Boneiru, na 2022 tabatin e partisipashon laboral nèto di mas haltu, ámbos 73 porshento. Ku esei e partisipashon laboral tabata ainda un tiki mas haltu ku na Hulanda Oropeo. Na Saba, e partisipashon laboral tabata 67 porshento.
Un parti relativamente grandi di e poblashon di Hulanda Karibense tabatin vmbo, mbo-1 òf enseñansa básiko komo e nivel di edukashon di mas haltu na 2022 . Na Boneiru i Sint Eustatius esaki tabata konta pa mas ku mitar di e poblashon aktivo. Na 2021, mas ku 70 porshento di e habitantenan di 15 aña p’ariba tabata satisfecho ku nan oportunidatnan di estudio. E satisfakshon ta varia entre 72 porshento na Saba pa 75 porshento na Sint Eustatius. Na Hulanda Oropeo e ta 85 porshento.

Splikashon

Sustainable Development Goals (SDG, Metanan di Desaroyo Sostenibel)

• SDG 1: Sero pobresa,
• SDG 3: Bon salubridat i bienestar,
• SDG 4: Enseñansa di kalidat,
• SDG 5: Igualdat di género,
• SDG 7: Energia pagabel i duradero,
• SDG 8: Trabou digno i kresementu ekonómiko,
• SDG 10: Redusí desigualdat,
• SDG 11: Siudat i komunidatnan duradero, i
• SDG 16: Pas, hustisia i servisionan públiko fuerte

Promedio (mediaan) di entrada disponibel

E promedio (mediaan) standarisá di entrada disponibel pa kas di famia, na dòler. Den e kalkulashon ta koregí diferensia den grandura i komposishon di kasnan di famia. E promedio ta e resultado, un sifra despues ku bo konta e total di sifranan i dividí esaki den e kantidat di sifra ku tin. Den preisnan konstante na aña 2022.

Fuente:

Dashboard - Monitor Brede Welvaart en SDG's Caribisch Nederland 2024
(Dashboard - Monitòr Prosperidat amplio i SDGnan Hulanda Karibense 2024)
https://www.cbs.nl/nl-nl/visualisaties/monitor-brede-welvaart-caribisch-nederland