Komienso di e proyekto piloto “Famia Fuerte” pa sosten familiar intensivo
Riba djaweps 24 di òktober 2024, komienso di e proyekto piloto “Famia Fuerte” a tuma lugá. Famia Fuerte tin komo meta pa restablesé balansa den famianan ku vários problema, di moda ku ta seif pa tur miembro di e famia biba huntu. E enkuentro tabata pa profeshonal i direktiva di e organisashonnan ku huntu ta forma Famia Fuerte.
Dikon Famia Fuerte?
Tantu investigashon komo eksperensia for di práktika ta demostrá ku falta asistensia ambulante intensivo na Hulanda Karibense pa mucha ku ta bini di famia ku problema riba vários tereno. Pa e motibu ei, Kuido i Hubentut Hulanda Karibense (ZJCN, Zorg Jeugd Caribisch Nederland) huntu ku Sentro Akseso, Expertisecenter Onderwijs Zorg (EOZ, Sentro di Ekspertisio Kuido den Enseñansa), Mental Health Caribbean (MHC) i Kuido pa Hóben (Jeugdzorg) a desaroyá un oferta nobo di asistensia na famia.
Kiko Famia Fuerte ta hasi?
Un tim integral ku kolaboradónan di Sentro Akseso, EOZ, MHC i Kuido pa Hóben lo ehekutá Famia Fuerte na Boneiru den forma di un proyekto piloto di un aña. Dor di traha huntu mas estrechamente for di momentu di registrashon di un famia, uni ekspertisio, í aktua a base di e vishon ‘hasi loke ta nesesario’, Famia Fuerte ke sostené e famianan intensivamente. Asina nos por ofresé mihó kuido pa asina por prevení ku ta pone mucha pafó di e kas di famia.
Tessa Zitman (lider di proyekto ZJCN):“Ku Famia Fuerte, realmente nos ta tuma tempu pa famianan, i ta ofresé nan un man ekstendé, kaminda e famia tin mester di esei. Nos no ta aserká e problemanan komo problemanan separá òf djis komo un ‘problema di Kuido pa Hóben’, sino ku nos ta wak henter e konteksto. Einan kaminda e problemanan realmente ta i ta originá, por ehèmpel den kaso di debe òf strès den e famia, nos ta ofresé e sosten adekuá. Asina nos ta aliviá e strès i ta oumentá e seguridat pa e muchanan. Dor di uni forsa, tambe nos ta spera di oumentá forsa di e famianan, di moda ku – finalmente – nan por sigui nan kaminda sin Famia Fuerte.”
Anoek Hansen (direktor-ehekutivo di EOZ): “Famia Fuerte tin e intenshon di sostené famia i huntu ku e famianan, deskubrí e forsa di e famia, pa motibu ku semper tin kos ku ta bai bon. Famia Fuerte ke hasi uso di e partinan fuerte pa alkansá metanan i, kaminda ta nesesario, pidi e propio ret pa duna un man pa yuda. Famia Fuerte ke hasi e famianan ainda mas fuerte, di moda ku despues nan mes por sigui, ku orguyo, komo un Famia Fuerte.”
Kon pa sigui awor?
Den e proyekto piloto tin espasio pa sostené 15 famia. E organisashonnan ku ta partisipá por registrá famia. Durante e proyekto piloto, lo investigá si e aserkamentu ta efikas, i kiko sí òf kiko no ta funshoná. Despues di e proyekto piloto lo wak si por ofresé e oferta aki strukturalmente na Boneiru, i lo investigá e posibilidatnan pa ekstend’é pa Saba i Sint Eustatius, kaminda aktualmente ainda no tin e oferta aki.