Proposishon di lei ‘Protekshon kontra diskriminashon na BES’ faktibel i nesesario
Ministerio di Asuntunan Interno i Relashonnan den Reino (BZK) ta trahando riba legislashon tokante trato igual na e partinan karibense di Hulanda. Investigashon na Boneiru, Sint Eustatius i Saba a demostrá ku e proposishon di lei ta faktibel i importante pa e habitantenan di e islanan.
E legislashon nobo ta nifiká ku habitantenan di Boneiru, Sint Eustatius i Saba den futuro por hasi un apelashon riba leinan tokante trato igual ora nan ta sinti nan diskriminá. Aktualmente, e legislashon ei ainda ta na vigor solamente den e parti Oropeo di Hulanda.
Frakshonnan den Tweede Kamer ta positivo tokante e proposishon di lei. Pero, ainda nan ta puntra nan mes kua konsekuensianan práktiko i finansiero introdukshon di e legislashon tokante trato igual lo tin na Boneiru, Sint Eustatius i Saba, i si e proposishon di lei ta tene kuenta sufisientemente ku e sirkunstansianan karibense. Djabièrnè siman pasá, Minister di BZK a manda e kontestanan riba e preguntanan di Tweede Kamer bèk pa Kamer.
Un ofisina di investigashon eksterno a investigá e impakto di e legislashon tokante trato igual. E konklushonnan di mas importante ta ku e legislashon nobo ta faktibel i ku e ta nesesario tambe; tin hopi hende ku ta eksperensiá diskriminashon na e islanan. Sí ta asina ku e base di sosten pa bishitá un lokèt kontra diskriminashon mester krese ainda. Pa e motibu ei, informashon aktivo tokante nifikashon di e lei nobo i di e posibilidat pa haña asistensia ta importante. Tambe, e Minister ta indiká ku tin espasio pa trabou na midí, di moda ku den e ehekushon por tene kuenta ku e sirkunstansianan lokal.
A manda e informe kompleto di e investigashon huntu ku e kontestanan pa Tweede Kamer. Bo por les’é aki. Tratamentu i votamentu tokante e proposishon di lei ta sigui pronto.