Habitantenan di Boneiru lo risibí nan tarheta di seguro di kuido médiko entrante 28 di òktober
BONEIRU - Kuido & Hubentut Hulanda Karibense (ZJCN) entrante 28 di òktober ta introdusí e tarheta di seguro di kuido médiko (zorgpas) na Boneiru. E tarheta di kuido médiko ta remplasá e prueba di seguro médiko di papel. Anteriormente, aseguradonan mester a pasa tuma un prueba di seguro na e ofisina di ZJCN promé ku un biahe pa eksterior. Ku e tarheta di seguro di kuido médiko nobo, esaki ya no ta nesesario mas. Ademas, por usa e tarheta di seguro di kuido médiko na Boneiru tambe pa kuido regular serka dòkter di kas, na botika, na laboratorio i den hospital.
Tarheta di seguro di kuido médiko komo prueba di seguro
E tarheta di seguro di kuido médiko ta remplasá e prueba di seguro di papel. Awor, asegurado ku un periodo di seguro mínimo di dos aña ya no tin nodi di bai e ofisina di ZJCN mas pa tuma un prueba di seguro promé ku nan biaha. E tarheta di seguro di kuido médiko ta personal, i e ta un prueba di inskripshon serka ZJCN. Riba e tarheta di seguro di kuido médiko tin e datonan di e asegurado i e datonan di kontakto di ZJCN. Den kaso di kuido médiko urgente den eksterior, mester tuma kontakto mas pronto posibel ku ZJCN. Ku introdukshon di e karchi di kuido e prosesonan, tantu pa asegurado komo pa dunadó di kuido, ta bira mas simpel i mas efisiente. E tarheta di seguro di kuido médiko no ta un seguro di biahe.
E intenshon di e tarheta di seguro di kuido médiko ta solamente pa kaso di kuido médiko urgente den eksterior ku no por posponé. ZJCN ta konsehá tur habitante di Hulanda Karibense pa sera un seguro di biahe promé ku biaha pa eksterior.
Tuma e tarheta di seguro di kuido médiko
Habitante di Bonaire ku ya tin por lo ménos dos aña sigurá serka ZJCN, por tuma nan tarheta di seguro di kuido médiko a base di edat na Kralendijk, for di 28 di òktober te ku 30 di novèmber. Entre 2 di desember i 7 di desember tambe tin posibilidat pa buska e tarheta di seguro di kuido médiko na Rincon. Wak skéma.
Dokumentonan rekerí
Na momentu di tuma e tarheta di seguro di kuido médiko mester mustra un sédula bálido í entregá e formulario di kliente yená; esaki ta optenibel tantu online komo serka e ofisina di ZJCN. No ta aseptá otro formanan di identifikashon, manera pasaporte òf reibeweis. Mayor ku yu bou di 18 aña por tuma tarheta di seguro di kuido médiko di nan yu.
Tambe ta nesesario pa duna number di kuenta bankario, di moda ku por registrá e informashon aki den e banko di dato di ZJCN pa futuro pago (médiko). No tin gastu mará na optené e tarheta di seguro di kuido médiko. Ora di remplaso sí lo kobra gastu.
Formulario di Outorisashon
Habitante di Boneiru ku ta ménos móbil òf ku tin otro limitashonnan, por outorisá un miembro di famia via e formulario di outorisashon, ku ta optenibel tantu online komo serka e ofisina di ZJCN. Si no logra tuma e tarheta di seguro di kuido médiko, por manda un e-mail pa info@ZorgVerzekeringsKantoor.nl òf pasa na ofisina di ZJCN pa traha un sita.
Pa mas informashon, bo por akudí na: http://www.zvkcn.nl/