Proposishon di lei BSN i Gobièrnu Digital pa Boneiru, Sint Eustatius i Saba a bai Tweede Kamer
Tur hende na Boneiru, Sint Eustatius, i Saba mester por regla nan asuntunan ku gobièrnu mihó, di un manera fásil i konfiabel. Na e balinan i tambe ònlain. Pa e motibu ei, na aña 2025 e abitantenan di e islanan ta haña un number di servisio di siudadano (BSN, burgerservicenummer). Esaki ta stipulá den e proposishon di lei ku Sekretario di Estado Szabó (Digitalisashon i Relashonnan den Reino, BZK) a proponé pa manda pa Tweede Kamer awe. Ku esei, introdukshon di e BSN ta kana na tempu.
Mihó servisio gubernamental
Introdukshon di e BSN ta un promé paso riba e kaminda pa mihó servisio gubernamental. Fuera di e servisio na bali, den futuro abitantenan lo por regla mas i mas asuntu ku gobièrnu ònlain. E servisio ei tambe mester ta seif i konfiabel. Pa e motibu ei ta nesesario pa tur hende tin un number personal konfiabel i medio di ‘log in’ serka henter gobièrnu. E BSN ta duna gobièrnu siguridat tokante identidat di un persona. Ku tempu, lo ta posibel pa uz’é serka tur gobièrnu na Hulanda Karibense i na Hulanda Oropeo. Mayoria abitante awor ainda tin e number di ID. Despues di introdukshon di e BSN, e number ei lo sigui den uso temporalmente.
Mas i mas digital
E proposishon di lei tambe di forma adelantá ta regla e eksigensianan pa hasi uso di medio di ‘log in’ ònlain. Por ehèmpel DigiD pa abitante i eHerkenning (rekonosementu elektróniko) pa empresario. Ku un BSN por hasi petishon pa DigiD pa ‘log in’ riba wèpsait di gobièrnu i organisashon konektá na DigiD. Esaki ta posibel mesora serka gobièrnu i organisashon na Hulanda Oropeo. Den futuro, mas i mas esaki lo bira posibel serka e gobièrnunan na Boneiru, Sint Eustatius i Saba. Aktualmente, e gobièrnunan riba e islanan ta traha riba konekshon di servisionan riba DigiD. Mester adaptá e sistemanan pa esaki, promé. Pa e motibu ei, gobièrnunan ta konektando riba DigiD paso pa paso di moda ku den futuro, mas i mas servisio gubernamental di e islanan ta bin ònlain.
Konseho Raad van State
Raad van State a duna un konseho positivo tokante e proposishon di lei. Despues, a adaptá algun tópiko di e proposishon i a bolbe sinkronisá nan bon ku e gobièrnunan na Boneiru, Sint Eustatius, i Saba. Un kambio importante ta ku a skrap inklushon di e BSN riba tarheta di identifikashon (sédula) for di e proposishon di lei. Asina ta protehá e BSN mihó, komo ku e number ta resultá ménos r’apido den man di organisashon komersial, por ehèmpel. E Entidat Públiko ta bira responsabel pa otorgá e BSN na e propio abitantenan, meskos ku esei ta konta pa munisipionan.