Rapòrt di inspekshon: situashon di Selibon ta preokupante, kompliká i urgente
Inspekshon di ambiente di bida i transporte (Inspectie Leefomgeving en Transport - ILT) den su rapòrt di inspekshon ‘Vergunningverlening, toezicht en handhaving bij Selibon Lagun’ ta konstatá ku situashon na e sentro pa depositá shushi i lèntfel na Boneiru ta preokupante, kompliká i urgente. “Semanalmente tin oumento di riesgo pa e medioambiente (aire, tera/supsuela, awa bou di tera i kandela)”, ILT ta bisa. Ademas, for di un estudio sientífiko resien a resultá ku e awa di laman den e bahia di Lagun pegá ku Selibon ta kontaminá, entre otro ku metalnan pisá. Ekspertonan ta indiká ku ta plousibel ku tin riesgo pa naturalesa i salubridat públiko.
Di 27 te ku 30 di ougùstùs ILT a ehekutá un inspekshon adishonal. E inspekshon aki tabata dirigí riba e otorgamentu di pèrmit, e supervishon i mantenshon (VTH) dor di entidat públiko Boneiru (OLB) na Selibon, na e sitio Lagun. E defisiensianan den e proseso di supervishon i mantenshon (‘VTH-proces’) a kondusí na e huisio di e tim di inspekshon di riesgonan konsiderabel pa medioambiente i posibel riesgonan pa salubridat públiko. Ta asina ku Selibon no ta disponé di un pèrmit di molèster / pèrmit Lei di vrom BES (‘vergunning Wet vrom BES’). E lèntfel no tin pèrmit, no tin tranké i ta benta shushi afó práktikamente di forma deskontrolá.
Riesgonan di medioambiente
Riba e tereno tin 9 kònteiner sin fria ku desperdisio biomédiko aden ku no por kima, pa motibu ku a deskontinuá e planta di kima shushi despues di keho di abitantenan den bisindario. E desperdisio den e kònteinernan aki ta parsialmente paketá den diferente barí será i parsialmente den saku di shushi di plèstik. E kantidat di kònteiner ta oumentá i tin kònteiner ku ya ta stashoná ei pa mas ku un aña. Vários kònteiner ta den mal estado.
Asbèst
Tambe tin 19 kònteiner ku material ku ta kontené asbèst stashoná ei. Un parti di e material aki pa basta tempu i no sufisientemente paketá a keda pafó di e kònteinernan kaminda ku kontaminashon di e suela por tuma lugá. Pa motibu ku e lèntfel no ta disponé di fasilidatnan di protekshon di suela, komponentenan kontaminá seguidamente por spula via áwaseru bai den e supsuela i awa riba superfisie.
Ademas, for di mart 2024 diferente kandela a surgi riba e lèntfel. Te ainda no a paga e kandelanan aki kompletamente ku komo resultado ku kontinuamente tin kandelanan chikí ku ta okashoná molèster di huma i holó.
Seguidamente
Mirando e seriedat di e opservashonnan ILT ta manda e resultadonan di e inspekshon pa Representante di Reino suplente di Boneiru, Sint Eustatius i Saba. E ta e outoridat kompetente ku a base di e konklushonnan di ILT por tuma siguiente pasonan nesesario den direkshon di entidat públiko Boneiru (OLB) pa sòru pa e kolegio atendé ku e situashon rápidamente i dirigí.
Ròl di ILT
For di aprel 2024 kompanianan na Boneiru, Sint Eustatius i Saba mester kumpli ku e regulashonnan di medioambiente for di e ‘Inrichtingen- en activiteitenbsluit BES (IAB BES). E regulashonnan aki ta un aktualisashon di e pèrmit di molèster lokal i ta destiná pa protehá e ambiente di bida di e abitantenan di Hulanda Karibense mas mihó. Inspekshon di ambiente di bida i transporte (Inspectie Leefomgeving en Transport - ILT) ta e supervisor di ministerio di Infrastruktura i Maneho di awa. Ku 1.600 empleado ILT ta traha diariamente na seguridat, konfiansa i durabilidat den transporte, infrastruktura, medioambiente i biba.