CBP BES ta imponé sanshon atministrativo korektivo riba Entidat Públiko Boneiru pa motibu di violashon kontinuo di legislashon di privasidat
Komishon Supervishon Protekshon di Dato Personal BES (CBP BES) a disidí pa imponé entrante inmediato, un sanshon atministrativo korektivo riba Entidat Públiko Boneiru (EPB). A yega na e desishon akí debí ku konstantemente no ta kumpli ku palabrashonnan krusial tokante protekshon di dato personal di siudadanonan na Boneiru. No opstante ku a atvertí diferente bia, EPB a keda sin implementá medidanan rekerí, di manera ku dato personal di habitantenan te ainda ta vulnerabel pa mal uzo.
Reakshon di EPB
Den un reakshon di 23 di sèptèmber 2024 riba e intenshon di e komishon pa imponé sanshon, EPB a duna di konosé ku a pone rekursonan finansiero disponibel na 2022 i 2023 pa implementá e rekomendashonnan di CBP BES i ku a implementá un seri di medida. No opstante esei, EPB no a logra implementá tur medida rekerí na tempu i kompleto. EPB ta duna komo motibu, opstákulonan organisatorio, manera repartishon di ámtenarnan riba vários edifisio i espasio pa traha limitá.
Ounke ku EPB ta duna di konosé ku a logra sierto adelanto, entre otro a introdusí tarheta di akseso i a remplasá kashinan ku no por a sera, protekshon di dato personal ta keda insufisiente. Esaki tin e Komishon preokupá.
Evaluashon di e punto di bista
CBP BES ta haña preokupante ku dato personal di siudadanonan te ainda no ta sufisientemente protehá, no opstante atvertensianan anterior i e tempu ku a duna pa implementá mehorashon. EPB mes ta rekonosé ku protekshon di dato personal no ta optimal’ i ku ainda tin hopi kos ku mester sosodé. E informashon ku EPB a duna te ku awor no ta duna sufisiente konfiansa ku realmente a implementá e medidanan rekomendá i ku den futuro serkano lo protehá datonan di personal adekuadamente.
Mirando seriedat di e situashon akí, Komishon ta konsiderá nesesario pa awor si imponé di bèrdat e sanshon atministrativo korektivo anunsiá anteriormente. Intenshon di e medida akí ta pa konvensé EPB pa tòg implementá ainda tur seguridat organisatorio i tékniko nesesario. Keda sin kumpli ku esaki por kondusí na mas violashon di legislashon di privasidat, ku posibel konsekuensianan serio pa privasidat di siudadanonan.
Kontrol sin aviso previo
Despues di kuater siman, CBP BES lo ehekutá kontrolnan sin aviso previo pa mónitòr e progreso. E kontrolnan akí ta importante pa verifiká te kon leu EPB a tuma e medidanan nesesario pa protehá privasidat di siudadanonan. Si durante e kontrolnan akí resultá ku no a implementá e medidanan sufisientemente, lo kobra e sanshon atministrativo korektivo, ku por oumentá te na $90.000.
CBP BES ta insistí ku protekshon di dato personal ta un prioridat pa tur organisashon gubernamental. Siudadanonan tin derecho riba prosesamentu di nan datonan di manera sigur, i ku EPB tin un responsabilidat grandi den esaki.
Keda sin tuma e medidanan apropiá por tin konsekuensia serio pa privasidat i seguridat di siudadanonan di Boneiru, Sint Eustatius i Saba.
E rapòrt kompleto i mas informashon ta disponibel riba e wèpsait di CBP BES: www.cbpbes.com