Promé bishita di Sekretario di Estado Szabó na Isla Ariba
Sekretario di Estado Zsolt Szabó lo bishitá e Islanan Ariba Sint Maarten, Saba i Sint Eustatius di 29 di sèptèmber te ku 5 di òktober. Ta e di dos biahe di e sekretario di estado na e parti Karibense di Reino. E bishita ta pa sera konosí mas amplio ku e islanan, nan desaroyo ekonómiko i pa kombersá ku gobernante- i empresarionan.
Sint Eustatius
E programa ofisial ta kuminsá riba riba 30 di sèptèmber na Sint Eustatius, ku un enkuentro ku gezaghebber Alida Francis i kolegio ehekutivo. E sekretario di estado lo sera konosí tambe ku miembronan di konseho insular.
Durante un rekorido riba e isla e sekretario di estado lo risibí informashon tokante e último desaroyonan. Señor Szabó lo bishitá entre otro e haf, e trabounan na e klep i un proyekto di konstrukshon di karetera i e lo sera konosí ku algun empresario stashano. Durante un kaminata den e sentro históriko di Oranjestad, e sekretario lo siña konosé e historia i patrimonio (material) spesífiko di Sint Eustatius. Renobashon di e patrimonio kultural históriko di Sint Eustatius, ta hasi e isla mas atraktivo pa turismo i ta garantisá asina un impulso ekonómiko.
Saba
For di 1 di òktober sekretario di estado Szabó lo ta na Saba. E lo papia entre otro ku gezaghebber Jonathan Johnson, miembronan di kolegio ehekutivo i konseho Insular. Riba 2 di òktober e sekretario di estado lo ta presente na lansamentu ofishal di Govroam i Public Roam. E retnan di wifi aki mester garantisá internèt aksesibel i seif na Saba.
Durante un rekorido riba e isla e sekretario di estado lo bishitá entre otro un proyekto di agrikultura, kaminda ta hasi uzo di hidrokultura i e sitio unda lo traha e haf nobo. E sekretario di estado lo bai St. Johns tambe, unda ta trahando e sentro multifunshonal ku ta parti di Regio Deal Saba. Mas aleu e lo sera konosí ku Saba Reach, un programa dirigí riba hasi personanan vulnerabel mas independiente i e lo papia ku algun empresario sabano.
Sint Maarten
Na Sint Maarten señor Szabó lo tin un enkuentro ku gobernador Ajamu Baly riba 3 di òktober. E dia ei ta karakterisá mas aleu pa kombersashonnan gubernamental ku Promé Minister demisionario, Luc Mercelina i e gabinete demisionario. E sekretario di estado lo hasi un bishitá tambe na parlamento, kaminda e lo topa e miembronan nobo di parlamento. Na aeropuerto di Sint Maarten e sekretario di estado lo risibí informashon aktualisá riba vigilansia di frontera. Otro desaroyonan relevante ku lo informá e sekretario di estado di dje, ta entre otro e rekonstrukshon di Sint Maarten despues di e orkannan, e situashon na sentral di energia GEBE i e Pakete di Pais. Tambe señor Szabó lo bishitá prizòn Point Blanche. Hulanda ta kontribuí na realisashon di un prizòn nobo. Ademas e sekretario di estado lo papia ku representantenan di sektor empresarial riba klima di invershon na Sint Maarten.