Eksitoso anochi di informashon RDI, Duana CN i KvK Bonaire
Resientemente RDI a organisá un seshon di informashon eksitoso den kolaborashon ku Duana CN i Kámara di Komèrsio Boneiru.
Durante e enkuentro a introdusí e personal di Rijksdienst Digitale Infrastructuur (RDI) i Duana CN. Despues e presentenan a risibí informashon importante tokante e importashon i uso di ekiponan ku ta transmití señal di radio na Hulanda Karibense. RDI a splika e tipo di interferensia ku sierto transmisor di radio por kousa i kiko konsumidó mester tene na kuenta ora di kumpra aparato manera kámara di siguridat, monitòr di mucha i stashon di tempu.
Duana CN a duna splikashon detayá di nan tareanan prinsipal, e reglanan tokante telekomunikashon, prosedura, i nan manera di operá.
RDI tin un ròl ehekutivo i di supervishon riba tereno di telekomunikashon pa Boneiru, Sint Eustatius, i Saba. For di nan ofisina na Boneiru, e personal ta manehá e spèktrùm di frekuensia di radio pa e tres islanan dor di asigná frekuensia, monitoriá nan, i hasi inspekshon. Públiko por dirigí su mes na RDI pa informashon tokante ekiponan aprobá ku ta transmití señal di radio, pèrmit di frekuensia, eksámen pa operador di radio, importashon di transmisornan di radio, i interferensia ku ta kousá pa òf ta ser afektá pa ekiponan di radio.
Den e aña benidero, RDI lo organisá tambe enkuentronan informativo na Saba i Sint Eustatius.
Pa mas informashon bishitá www.rijksdienstcn.com. Pa pregunta, por manda un meil na BES@rdi.nl òf yama na 717 3140. E ofisina di RDI ta situá na Kaya Grandi 69 i bishitantenan semper ta bon biní.